كود -وكالات //
فالعصر الوسيط، كانت الكنيسة الكاثوليكية كتبيع وراق رسمية للناس كتسمى “صكوك الغفران”. الفكرة كانت هي أن أي واحد دار ذنب، يقدر يشري هاد الصك بالفلوس باش الكنيسة تغفر ليه ويدخل للجنة. مارتن لوثر بان ليه هادشي استغلال خطير للدراوش وتجارة باينة بالدين، وهادشي اللي خلاه ينوض ويحتج.
لوثر كتب الأفكار ديالو (95 أطروحة) باللاتينية باش تناقشوها العلماء، ولكن اللعبة تبدلات ملي تترجمات الأطروحات للغة الألمانية د الشعب. وبفضل “المطبعة” اللي كانت عاد تخترعات فداك الزمان، تطبعات آلاف النسخ فظرف سيمانات قليلة، وتشنعات الأفكار ديالو فألمانيا وأوروبا كاملة، وولاو كاع الناس كيهضرو عليها.
فالأول الكنيسة ما داتهاش فالموضوع، ولكن ملي شافت أفكار لوثر كتهدد السلطة ديالها، خرج البابا قرار رسمي كيهدد فيه لوثر بالطرد من الدين إلا ما تراجعش، لوثر ما خافش، ودار خطوة صدمات العالم: شد القرار د البابا وحرقو قدام عباد الله، وهادشي شعل مواجهة نيشان مع روما.
هاد الاحتجاج تسبب فانقسام تاريخي كبير فالمسيحية الغربية بين الكنيسة الكاثوليكية القديمة ومذهب جديد سميتو “البروتستانت” (يعني المحتجين)، هاد المذهب الجديد بدّل بزاف د الحاجات، بحال تحياد التماثيل من الكنائس، والاعتماد على الإنجيل بلغة الشعب ماشي باللاتينية.
الحركة د لوثر ما بقاتش غير فالدين، ولكن تحولات لثورة سياسية، بزاف د الأمراء فـأوروبا لقاوها فرصة باش يهربو من السيطرة د البابا ويخبيو الفلوس د الضرائب فجيوبهم. هاد الطمع السياسي والديني دخل أوروبا فحروب دموية طاحنة دامت سنين، وهي اللي عاودات رسمات الخريطة د القارة وعطاتنا السياسة الحديثة اللي كنعرفو اليوم.