كود – وكالات//
فـ 29 أكتوبر 1923، علن مصطفى كمال أتاتورك رسمياً قيام الجمهورية التركية، وهادشي جا من بعد ما طاحت الدولة العثمانية اللي حكمات قرون طويلة.
هاد النهار ما كانش غا ديال تغيير سمية ولا نظام حكم، ولكن كان زلزال سياسي واجتماعي كبير، علن فيه أتاتورك نهاية نظام الخلافة .
هاد التحول الكبير ما جاش بالساهل، حيث بعد ما سلاو الحروب العالمية ولقاو الأتراك راسهم خاسرين والتحالف الأجنبي مقسم بلادهم، بان أتاتورك كقائد عسكري حكيم وقاد حرب الاستقلال وتغلب على القوات الأجنبية، وملي ربح الحرب واسترجع سيادة البلاد، بان ليه بلي الطريقة الوحيدة باش تركيا ترجع قوية هي يقطع الصلة مع الماضي ويبني دولة على أسس عصرية كتشبه للدول الغربية المتقدمة.
الأساس اللي بنى عليه أتاتورك هاد الدولة الجديدة كيتسمى “الكمالية” (Kemalizm)، وهي مجموعة من القيم العلمانية القاصحة اللي بدلات وجه تركيا وثقافتها.
الركيزة الأولى لهاد المشروع كانت هي فصل الدين على الدولة، مني حيد الإسلام كدين رسمي في الدستور، وحبس المحاكم الشرعية، وعوض الشريعة بقوانين مدنية .
هاد العلمانية غيرات المجتمع من الجدر,تمنعات ظاهرة تعدد الزوجات، وتعطى للمرأة الحق في الطلاق والمساواة فالإرث، زيد عليها أن تركيا عطات للمرأة حق التصويت والترشح فعام 1934 قبل من دول أوروبية بحال فرنسا وإيطاليا، وزيد عليها، دار أتاتورك ثورة ثقافية ملي حيد الحروف العربية اللي كانت كتكتب بها اللغة العثمانية وتعوضات بالحروف اللاتينية لتسهيل التعليم وربط البلاد بالغرب.
وحتى مظهر الناس في الزنقة تبدل بزز من طرف الدولة مني تمنع الطربوش واللباس التقليدي، وتفرض اللباس العصري في الإدارات والمؤسسات، وتفرضات قيود على الرموز الدينية، وبلاصة ما يكون الرابط بين الناس هو الدين أو “الأمة الإسلامية”، رجع الرابط هو “الوطن” والقومية التركية، وخرج بمقولته الشهيرة: “شحال زوين ملي كتقول أنا تركي”.
اليوم، كيتعبر 29 أكتوبر “عيد الجمهورية” وأهم عطلة وطنية عند الأتراك حيت كيشوفوه نهار اللي تجمعات فيه بلادهم من الشتات وولات دولة قوية. وخا دازت عقود، بقات هاد القيم العلمانية اللي خلاها أتاتورك هي الخط الأحمر اللي كيدافعوا عليه العلمانيين.