كود الرباط//

اليوم الخميس 4 يناير 2024، تأكد رسميا بليّ النقابات التعليمية ماقدراتش تقنع الأساتذة يرجعو للأقسام، وبلي التنسيقيات هي الممثل القوي للشغيلة التعليمية.

وعاينت “گود” حضور الآلاف من الأساتذة لللي جاو للرباط بناء على الدعوة للي دار التنسيق الوطني لقطاع التعليم باش يكون إضراب ووقفة اليوم الخميس.

مسيرة كبيرة مور جوج اتفاقات دارتهم الحكومة مع النقابات، بإشراف رئيس الحكومة عزيز أخنوش، وبحضور وزراء وازنين بحال وزير الميزانية فوزي لقجع، ووزير التربية الوطنية شكيب بنموسى.

التنسيق لي فيه كثر من 20 تنسيقية تحداو الحكومة والنقابات وقررو يرجعو للشارع، عبر تنظيم وقفة احتجاجية قدام مقر وزارة التربية الوطنية اليوم الخميس.

الوقفة بدات من البرلمان وغادا لمقر الوزارة لحدود كتابة هذه الاسطر.

بنموسى مبقا ليه دبا غير يقدم الاستقالة..مقدرش على تدبير احتجاجات التعليم.

وتشبث التنسيق بمطالبه اللي قدمها لرئاسة الحكومة، معلنا رفض الاتفاقات للي كانت بين النقابات والحكومة سواء اتفاق ديال 10 دجنبر او اتفاق 26 دجنبر.

الحكومة واخا عطات عرض سخي واللي غايكلف ميزانية الدولة عشرات ملايير دراهم فهاد عامين ونص لي بقات فعمر هاد الحكومة، إلا أنها مقدراتش تفك وحلة احتجاجات التعليم.