ݣود-كازا //

كيفما شارت ݣود سابقا، شركة “أوبر” العالمية، لي كتعطي خدمات النقل من التطبيقات الذكية، علنات اليوم الخميس 27 نونبر 2025، رجوعها للمغرب بعدما خرجات قبل 6 سنين. البداية غادي تكون فالدار البيضاء ومراكش، وهادي خطوة مفاجئة بلا ما يكون أي تأكيد رسمي من السلطات المغربية، خصوصاً أن القانون لي كينظم النقل من التطبيقات مازال ما موجودش.

الشركة قالت فبيان ليها إن المستخدمين يقدرو يطلبو الرحلات دابا  UberX وUberXL، مع بزاف ديال المزايا بحال الرحلات بعدة وجهات، الحجز مسبق، الأداء الإلكتروني، والدعم 24 ساعة فاليوم، وهاد الرجعة ديالها كتهدف باش تسهّل التنقل فهاد المدن السياحية.

تصريحات الشركة كتورّي أنها باغية تتوسع حتى ف مدن مغربية أخرى، خصوصاً مع الارتفاع الكبير فعدد السياح لي كيجيو للمغرب واستعداد البلاد باش تستضيف فعاليات عالمية بحال كأس العالم 2030.

ولكن هاد الرجعة كتطرح بزاف ديال الأسئلة، حيث أوبر خرجات من المغرب سنة 2018 بسبب غياب القانون وصدامات مع سائقي الطاكسيات، ووزارة النقل كانت شددت فشهر أكتوبر لي فات أن النقل العمومي خاصو ترخيص مسبق لي كيمنح غير للجهات المنظمة قانونياً. هاد الشي كيبقى غامض دابا حتى يجي توضيح رسمي.