الوالي الزاز -كود- العيون///
فمحاولة جديدة يبان فيها، علمت “كود” أن مصطفى بايطاس الوزير المنتدب لدى رئاسة الحكومة، المكلف بالعلاقات مع البرلمان الناطق الرسمي باسم الحكومة قرر يتبرع بالجمال اللي جاوه فزردة كبيرة، والمناسبة الرجوع ديالو من الحج واخا ما خلص فيها والو هاد الحجة. اختاروه فاخر دقيقة باش يرأس الوفد. يعني حاج ومعطياه فلوس الدولة للمصاريف تماك.
وفق مصدر “كود” فهاد لجمال اللي عددها 30 غادية تعطى لشي جمعية ديال اليتامي وشي مدارس للقرآن فسيدي ايفني. ماشي حبا فالعطاء٬ لأن اللي كيعطي كيعطي من فلوسو. هاد الشي باينة فيه ريحة الانتخابات الجاية.
الحفل لي دار بايتاس فدارو فحي كولومينا بسيدي إفني كان فيه بزاف ديال التملقين ولحاسين الكابا من طرف منتخبين ومسؤولين، وأغلب هاد الناس لي جابو ليه الإبل كيقلبو على مصلحة شخصية أو غراض يقضيه ليهم، ونساو بأن الغرض الحقيقي هو أنهم خاصهم يخدمو ساكنة جهة كلميم وادنون ويطورو الجهة شوية، ولاسيما سيدي إفني لي كتعاني بزاف فمجال البطالة لي خلات ناس المنطقة تهاجر وبنيتها التحتية لي ضعيفة بزاف وكتستاحق منتخبين من ولادها أحسن من هادوك لي جاو لعند مصطفى بايتاس.
