احمد الطيب كود الرباط//

اللي عندو عندو، مصطفى بايتاس، الناطق الرسمي باسم الحكومة، واللي مكيعرفش يتواصل، مقدرش يرد بلغة الأرقام على تقرير بنك المغرب للي عطا توقعات تختلف مع توقعات الحكومة بخصوص نسبة النمو والعجز.

شوفو اش قال بايتاس اليوم جوابا على سؤال صحفي بخصوص تقرير بنك المغرب، قال: “عادة لا أعلق على هذه التقارير.. لابد أن نلاحظ النفس الإجابي في قضايا كبيرة مثل التضخم، والإمكانيات الكبيرة التي يتم تحقيقها من خلال الاستثمار”.

وأضاف بايتاس: “كل مؤسسة لها زاويتها وقرائتها تختلف، وبنك المغرب هو الاكثر في القراءات النقدية وفالمؤسسات الاخرى كاين شويا د الانطباعي وشويا د كذا..”. مشددا بلي “الحكومة بالرغم من الصدمات راهنت بقوة على الاستثمار العمومية”.

عكس الحكومة للي كتقول بلي توقعات نسبة النمو هاد العام غاتكون 3,4 في المائة، فإن بنك المغرب كيقول العكس ومثيقش توقع الحكومة وقال نسبة النمو مغاديش تقوت 2,8 في المائة.

بنك المغرب حط توقع قريب من توقع المندوبية السامية للتخطيط لي قالت بلي نسبة النمو غاتوصل ل2,9 في المائة.

تناقض الارقام بين مؤسسات ديال الدولة وصل للعجز في الميزانية، بنك المغرب يقول غايوصل لـ 4.4 فالمائة هذه السنة والحكومة تقول 4 بالمائة.