كود سبور//

ناويين بايرن ميونخ الألماني يرجعو الدولي المغربي الشاب أدم أزنو لعندهم، حيث واقفين عليه استعدادا للمشاركة فكاس العالم للأندية الصيف الجاي فالميريكان.

وحسب جريدة Footafrica، فبايرن ميونخ باغيين يديرو آدم آزنو فلاليست ديال الفريق المشارك فمونديال الأندية، وغايرجعوه لعندهم مع نهاية هذا الموسم بعد 6 أشهر ديال الإعارة لبلد الوليد الإسباني.

ووضح نفس المصدر، أن بايرن ميونخ قرر هذا الشي بعد إصابة اللي تعرض لها الكندي ألفونسو ديفيز، واللي سالات له الموسم الرياضي، ودابا بايرن غايرجعو الظهير الأيسر المغربي آدم آزنو باش يلعب فبلاصتو بعدما كانوا صيفطوه إعارة لبلد الوليد يدير ماتشات فرجليه.