كود الرباط//
يوم الخميس 20 أبريل 2023، كعادته اختار مصطفى بايتاس، الناطق الرسمي باسم الحكومة، (للي من الأفضل نسميوه بالهارب الرسمي من أسئلة الصحافيين)، يتجاهل أسئلة “كود”.
صحافي “كود” فالرباط، فسنة 2022، كان أكثر الصحافيين طرحا للأسئلة واللي احتل الرتبة الثانية وكان ضمن الصحافيين اللي مكيبغيش بايتاس يجاوب على أسئلتو.
بايتاس الوزير “الهارب” من أسئلة الصحافيين، مقدرش يقول حتى بأن الموضوع ديال العلاقات بين الرباط ومدريد اللي دار زوبعة فإسبانيا، موضوع يهم السيادة ولا يمكن التعليق عليه أو هذا موضوع لم يناقش في المجلس الحكومي، اختار التجاهل واللي نقدرو نوصفوه بنوع جديد من “الإساءة” للصحافة.
راه بهاد الإساءة للصحافة، كيزيد بايتاس يأكد شكوك واتهامات المنظمات الدولية حول حرية الصحافة فالمغرب، وكيزيد يقمع الصحافيين، ويرفض يبانو صورهم أثناء طرح الأسئلة ويتدخل فعدد الأسئلة لي خاص يطرحو، وهادشي عمرنا شفناه فشي دولة كتحترم راسها. هادشي كيسيء للمغرب وتاريخ العلاقة بين السلطة والصحافة.
سؤال “كود” للي طرحنا نهار الخميس هو “فالبرلمان الإسباني فجلسة مساءلة رئيس الحكومة سانشيث كان المغرب واعتراف الحكومة ديالهم بمغربية الصحرا من الإسئلة، كيف تابعات كود وطيلة أكثر من 3 سوايع، كلشي الأحزاب اليمينية واليمينية المتطرفة والقومية والوحدوية والانفصالية بما فيها بوديموس المشارك فالحكومة والجمهوري الكاتالوني المساند لها، هاجمو المغرب رفضو عاد الاتفاق وفيهم اللي وعد باش يتراجع عليه إلى وصل للحكومة، باستثناء الحزب الاشتراكي العمالي اللي منو رئيس الحكومة، كلشي هاجمنا. عايرنا.
وجاء فتتمة السؤال: “نوضو الصداع على تصريح لميارة على سبتة ومليلية اللي نفاه فكود، في حين أن النائبة الثانية لرئيس الحكومة ديالهم وللي فنفس الوقت وزيرة الشغل والاقتصاد الاجتماعي يولاندا دياز قالت علينا ديكتاتورية، وباللي ضد قرار تغيير إسبانيا لموقفها من الصحرا. واش المجلس الحكومي هدر على هاد الشي واشناهو موقف الحكومة؟؟.
الصحافة الإسبانية تناولت الموضوع بالتحليل وبالتصريحات وبمواقف السياسيين والوزراء الإسبان، إلا فالمغرب الحكومة ديالنا للي عندها ناطق فاشل فالتواصل ماهضرش ولا علق ولا يتفاعل ولا يعتذر عن الجواب. يا هاد الوزير، راه الصحافيين باغينك دير غير خدمتك، الصحافيين مامحتاجين منك والو من غير تجاوب وتعلم من قرانك لي سبقوك بحال بنعبد الله والراحل الناصري وغيرهم.
فتحقيق نشراتو ’’اليوم 24‘‘ قبل أيام، فيه أنو ف50 ندوة دارها بايتاس من نهار تعين حتى نهاية 2022، ما جاوبش على عدد من الإسئلة. 26 في المائة من الأسئلة المطروحة كتبقى بلا رد أي 201 سؤال.
اليومية الإلكترونية وضحات باللي قطاع الخارجية كيجي فالمرتبة الأولى اللي ما كيجاوبش عليه الوزير بنسبة 20 في المائة. إيلى كانت بعض هاد الأسئلة اللي كتهم الخارجية ماشي كلها يقدر يبرر لوزير عدم الإجابة عليها فكيفاش ما كيجاوبش على أسئلة بحال ارتفاع الأسعار. راه 8 في المائة من هاد الأسئلة ما تسوقش ليها لوزير.
المثير فهاد التحقيق كذلك أن بايتاس كيتعامل مع الصحافيين بعقلية غريبة. كاين اللي كيجاوب على أسئلتو وكاين اللي ما كيتسوقش ليه. ف3 صحافيين من 8 الأكثر طرحا للأسئلة، ما تلقاوش إجابات بنسب تتراوح ما بين 38 و50 في المائة. اللي متبع الندوات الصحافية غادي يعرف مثلا أن بايتاس ما كيجاوبش على أسئلة هشام اعناجي صحافي كود فالرباط ولا على أسئلة صحافيين أخرين. ما كيتسوقش لأسئلتو. بعض المرات باش كيكون كيسول ما كيشوفش فيه گاع. بحال ايلى ضرتو. فيما هو صحافي ولأخر سياسي.