گود سبور//

طاح المنتخب الوطني المغربي لأقل من 17 عام، طيحة خايبة اليوم الخميس بخسارة كبيرة وكارثية أمام منتخب البرتغال برسم الجولة الثانية من دور مجموعات كأس العالم أقل من 17 عام، المقامة حاليا بقطر.

المنتخب المغربي لأقل من 17 عام بطل أفريقيا بقيادة المدرب نبيل باها، خسر بنتيجة 6 لزيرو أمام منتخب البرتغال بطل أوروبا، اللي ماركاو فـ الشوط الأول 4 أهداف وفـ الشوط الثاني زادو 2 أهداف، وسط تلفة ديال اللاعبين المغاربة اللي ودروها فـ الماتش ومدرب باها اللي ما لقاش الحلول.

الماتش بين المغرب والبرتغال عرف حضور الجمهور المغربي، ولكن التشجيع ديال الأغلبية ديالو ما كانش ديال مشجعين د الكورة، حيث كانوا كايغنيو وكايشطحو على شي أغاني وشي موسيقى ماشي ديال التيران وماشي ديال الضغط على الخصم فـ التيران.

وبهذه النتيجة أصبح المنتخب الوطني المغربي تقريبا خارج كأس العالم لأقل من 17 عام، حيث خاصهم يربحو منتخب كاليدونيا بنتيجة كبيرة بزاف فوق 12 هدف باش يحاولو ينافسو على المركز الثالث ويتأهلو لثمن النهائي كأحسن ثالثة، حيث تماركاو 8 الأهداف، باحتساب هدفي الخسارة مع الجابون فـ الجولة الأولى، وما سجلو حتى هدف يعني عندهم ناقص 8، وهذا الشي راه صعيب بزاف إلى ما كانش شبه مستحيل، أما البرتغال فـ ضمنو التأهل إلى الدور الثاني.