محمد سقراط-كود///

بالنسبة ليا موطورات الشينوا راهم جائحة كيعاني منها المغرب أخطر من جائحة كورونا لأنها كتخلي قتلى وجرحى بالألاف سنويا وخصوصا في فئة الشباب على عكس كورونا أغلب ضحاياها الناس الكبار، وطبعا الدولة كانت هي المساهم الأول في هاد الجائحة فتحات السوق المغربي على هاد الموطورات وعلى تعديلهم حتى ولاو كيتباعوا بحال الزريعة في كل زنقة كتلقى ماكازا ديالهم، كما فتحات السوق أمام تعديل هاد الدراجات وإيستيراد البياس ديال التعديل، وحتى دازت سنوات وتطلات بيهم الدنيا  وأصبح من العرف أنك تاخد موطور شينوا وتبريباريه حيت أصلا كيجي ضعيف بزاف، عاد ناضت الدولة تدير حملة على تعديل الدراجات النارية، وعلى فين كانت سنوات وهادي والتعديل بالخصوص ماشي هو السبب الوحيد القاتل، راه أغلب السائقين بلا كاسك وماعارفين حتى فصل في قانون السير، وبزاف منهم مراهقين وأطفال كيضلوا يخيطو بيهم بين الزناقي، التعديل فقط جزء من الموشكيل.

طبعا هاد الموطورات كانوا عندهم فوائد كثيرة وبصح كانوا ومازالوا من أفضل وسائل فك العزلة على العالم القروي، التنقل بين الفيلاجات والمدن رجع ساهل وممكن ومكياخدش الوقت بزاف، دوز من حدا أي شانطي دابا غادي تلقاه قبالتو باركينغ ديال الماطر، كذلك المدارس والإدارات، الناس تهنات من النقل العمومي وولات تقدر توصل لخدمتها بالوقت،  وهادشي مفيد للإقتصاد الوطني، ولكن هاد الناس راه مكيجريو مكيخطو في الطرقان، في الغالب وراقهم مريكلين ودايرين الكاسك ديالهم وغادين لي خدمتهم، الموشكيل في جحافل المراهقين والجانحين والمجرمين وصحاب السينيالات بربعة وغادي مكسيري، هادشي بلا منهدرو على أن ماطر الشينوا كانوا من بين أسباب دمقرطة الكريساج وتوزيعو العادل في جميع ربوع المملكة، حيت مابقاش خاصك حتى تدوز من شي حي خطير باش تكريسا، أصبح الحي الخطير كيجي حتى لعندك فين ماكنتي، وكل يوم كنعيشوا على وقع حوادث وجرائم موطور الشينوا ضروري يكون جزء منها.

الحل ديال هاد الجائحة راه ماشي شي حاجة إعجازية، كاين دول كانوا عندها عصابات منظمة ديال صحاب الماطر ومع ذلك قدرات تتخلص من السطوة ديالهم في الشوارع بحال لي وقع في اليابان، أول قرار خاص يكون هو أي واحد كيستعمل دراجة بمحرك خاص يكون عندو البيرمي، مايمكنش واحد عندو موطور كيسافر بيه ويتنقل يوميا وهو ماعارف حتى البلايك شنو كيعنيو، والثمن خاص يكون ناقص وديال 49 سي سي يكون بلا امتحان سياقة فقط الإمتحان في قانون السير، وطبعا لي تعرض للإبتزاز أو تطلبات منو رشوة راه كاين الرقم الأخضر، حاجة خرى مهمة وبزاف وهي الكاسك ويكون كاسك مزيان محترم، راه شحال من واحد دار كسيدة قاتلة واخا بسرعة قليلة غير بسباب الكاسك معندوش باش مات، الكاسك لا نقاش فيه نهائيا، مدينة مثلا بحال فاس راه قليل فين كنشوف بنادم بالكاسك حتى كتكون الحملة عاد كيديروهم، دراري راكبين على ماطر كبار وبلا كاسك وهانية، وهادشي راه كاينة قوانين ديالو ولكن آليات تطبيقها مكايناش، والنتيجة ها شوارع المغرب بحال شي غابة ضباعها ماطر الشينوا وأسودها طريبورطور.