محمد سقراط-كود///

بالنسبة ليا الذين يدعون لمقاطعة المنتوجات  لي كتدعم إسرائيل هم أكثر الناس سادية وأنانية وكيتلذذوا يشوفوا الفلسطنيين كيتعذبوا ويموتوا وباغينهم يستمروا في هاد المعاناة إلى الأبد، أغلب النزاعات في العالم كتسالي بإستسلام أحد الطرفين وتوقيع معاهدة تقدر تكون مذلة بحال لي كان كيوقع في أوروبا والعالم  في الحربين العالميتين، وتقدر تكون بشروط إنسانية تقدر تخلي المنهزم يعاود ينوض من جديد بحال لي دارت ألمانيا واليابان والطاليان والعديد من الدول لي خسروا حروب ونزاعات واستسلموا للواقع والخسارة، وقرروا يبداو من الزيرو وراهم وصلوا وتحولوا لحلفاء أعدائهم في الماضي، كاين لي غادي يقول راه هادوك ممشاتش ليهم أرضهم وتشرد شعبهم، ولكن في الواقع أوروبا راه كل دولة واخدة طرف لدولة خرى، فرنسا ليومنا هذا واخدة مدينة للطاليان وواخدة إقليم من الماتيا وللصبليون وكذلك دول خرى، صافي مشات ليك ايما تكمدها وتعاود تنوضزبداكشي لي بقا عندك ايما تعيش مصير الهنود الحمر، وحتى هونا راه قاتلوا وتحاربوا حتى عاشوا في محميات بنمط العيش لي باغين.

حاليا الصراع واخا طول راه باين الكفة في أي جيهة كتميل، الحقيقة هو أن إسرائيل ربحات خدات الأرض ودارت عليها دولة محترمة وقوية بدعم الغرب او بدعم الفضائين الواقع المعاش هو هذا، والعرب والفلسطنيين خسروا، دابا خاص غير يعتازفوا بيها ويبداو صفحة جديدة، وبما أنهم ولاد العم فراه مناقصينش ذكاء او ابداع على اليهود كنظن، راهم قادرين ينوضوا بحال لي ناضوا من قبل منهم دول تدمرات بالكامل، أو غادي يبقى النزاع الى الابد او حتى ينقارض أحد الطرفين.

أنك تكون إنساني هو تبغي الصراع يسالي وتتوقف العداوة والحرب والموت والكره بين الطرفين، وهادشي راه خاصوا مفاوضات وضغط ماشي حروب عنثرية أضرارها مثر من فايدتها، سلعة أكتوبر راه نكسة في تاريخ الصراع وعار على حماس وكل من ساندها في هاد العدوان لي مكانت عندو حتى نتيجة إيجابية، بل العكس سبب في تدمير القطاع كامل وراه اليمن دابا كتريب بسبابوا، طبعا المقاطعة حق وانا نيت كنمارس هاد الحق يوميا ، ولكن بالنسبة ليا في الحالة ديال المنتوجات  لي كتدعم إسرائيل كنشوفوا فير انانية وتغذية لشعور سادي داخلي كيتمتع يشوف الأطفال الفلسطنيين كيموتوا يوميا.