الفنيدق ـ كود//

البارح ومغاربة سبتة المحتلة محتافلين بالانتصار التاريخي للمنتخب المغربي ووصولو إلى نصف نهائي المونديال بقطر، بان الوجه العنصري القبيح ديال بعض البوليس بسبتة، واللي كا يبان بلي ما عجبهمش أن المغاربة المقيمين بهاد المدينة يحتافلو بانتصار منتخب بلدهم الأصلي، ويخرجو للشوارع باش يعبروا على الفرحة ديالهم.

ومن هنا بان واحد البوليس كا يسلخ في نساء بزرواطتو لا لشيء إلا أنهم كانوا محتافلين وفرحانين بإنجاز المنتخب المغربي لكرة القدم.

الفيديو اللي صور عنصرية بعض عناصر الأمن بسبتة لقى رواج وتبادل واسع عبر تطبيقات التواصل الفوري، وخلف موجة استياء كبيرة لدى المغاربة سواء بسبتة أو بباقي مدن الشمال، حيت قرروا الضحايا يلجؤوا للعدالة باش يقتصوا من العنصرية والعنف اللي كانوا كيظنوا أنها اختفت لكنها مازال معششة في نفوس وتعامل الكثير من الإسبان.