كود حد السوالم//
واحد المشهد سوريالي عاشتو هاد الصباح الطريق الوطنية الساحلية، المعروفة بطريق آزمور، من بعد ما تفاجؤوا مستعملي الطريق بوضع أحجار كبيرة في طريقهم، وواحد “سبيرا” اللي دار هاد الحالة واقف معري وكا يمنع السيارات من المرور..
هاد المشهد السوريالي اللي اقترفوا واحد صاحب السوابق واللي معروف بترويج للممنوعات مم مخدرات وقرقوبي وخمر، وقع بالضبط عند دورة بن عمر في النفوذ الترابي لجماعة السوالم الطريفية، اللي تابعة للدرك الملكي بحد السوالم.
ولكن الخطير والغريب في نفس الوقت أن قطع الطريق تم على مسافة تقل عن 50 مترا على السد القضائي (الباراج) ديال الدرك الملكي في المنطقة اللي كا يتناوبوا عليه درك سيدي رحال ودرك السوالم، ورغم استنجاد مستعملي الطريق بعناصر الدرك اللي كانوا واقفين في “الباراج” ما تحركوش وما داروا حتى رد فعل، مدعين أنهم ينتظرون تعليمات رئيسهم، رغم أن الخطر كان قائما وظل قائما لمدة طويلة، بل إن قاطع الطريق اللي كان كيظهر أنو غاسل يديه على عناصر الدرك الملكي وما خايفش منهم، ما كانش مسوق ليهم.
وبقى عدد من المواطنين كل يحاولوا يربطوا الاتصال برئيس المركز لكي يصدر تعليماته ومستعملي الطريق من سيارات أجرة وسيارات أجرة ودراجات نارية كا يحاولوا مراوغة قاطع الطريق، وكا يخرجوا فوق الرصيف باش يحاولوا يدوزو لأن “سبيرا/الفرعون” قرر يمنع المرور…
وهذا ما كان، وهادي صورة مصغرة للفوضى التي تعم السوالم الطريفية وسيدي رحال بمناسبة هاد الصيف، لأن القائد الإقليمي ببرشيد “ينام في العسل” كيفما كيقولوا السكان…
