كود أكادير//

التدبير فيه وفيه، فالوقت لي لي شفنا شركة النظافة ديال مول الزبل عزيز البدراوي (لي قالي غادي ينقي الرجاء البيضاوي ) خلا احياء فسلا غارقا فالزبل بسبب عدم التزامو بالعقد حسب تصريح رئيس جماعة سلا لـ”كود”، فالمقابل كنشوفو جماعة اكادير  نجحات بسرعة فاحتواء ازبال العيد الكبير، علما ان هاد الجماعة مدايراش تدبير مفوض، قطاع النظافة هو لي مكلف وقاد بشغالو.

كاينا سرعة كبيرة فتنظيف المدينة لي كتستعد هاد الصيف لاستقبال ملايين المهاجرين والسياح، اضافة إلى العرس الثقافي الكبير “تيميتار”.

صور وفيديو توصلت بهم “كود”، تؤكد هاد العمل الكبير لي كتعرفو المدينة تزامنا مع الاشغال الكبير لاصلاح الطرق والاستعداد لفتح اوراش تنموية كبيرة وتغييرات غاتعطي نفس جديد للمدينة اللي كيسيرها رئيس الحكومة عزيز اخنوش.

وكان بلاغ صادر عن الجماعة تحدث عن توفير 160 عامل نظافة فهاد الايام ديال عيد الاضحى، اضافة إلى حاويات جديدة ودعم اسطول النقل.

البق ما يزهق فالمدينة لي معولة تكون قاطرة تواصل بين الجنوب والشمال، وسط المملكة كيف سماها الملك فخطاب تاريخي.

وتوقعت مصلحة النظافة جماعة أكادير، يوصل مجموع حجم النفايات فاليومين الاول والثاني من أيام العيد الكبير، إلى 1650 طن (فيها 500 طن فنهار لور و1100 طن فاليوم الثاني).

هاد الضغط غايكون فيومين اللولين، ولهاد المناسبة قامت الجماعة مند 6 يوليوز الجاري، بتوزيع 110 آلاف كيس بلاستيكي خاص بجمع النفايات المنزلية، مخصصة للتجمعات السكنية المنظمة.

ومن الاجراءات كذلك، تم توزيع مابين 20 و30 ألف كيس بلاستيكي على جمعيات الأحياء، أما حصة الادارات العمومية والجماعة فكانت 20 الف كيس، في حين تم توزيع 40 ألف كيس من طرف السائقين التابعين للجماعة الترابية بأكادير.