كود – الرباط//

اليوم نهارالرباط لبسات الحمر والخضر، والفرحة كانت بانة على وجوه الناس اللي تجمعو فـ شارع محمد الخامس باش يستناو مرور موكب سيدنا، بمناسبة افتتاح السنة التشريعية.

من بكري بعد الظهر بدات اجواء الفرحة بشارع محمد الخامس، ناس جاو من مناطق مختلفة، لابسين تقليدي وعصري، والجو عامر بالنشاط.

فرق فلكلورية بالطعريجة والبندير، وناس كيصفقو وكيغنيو “عاش الملك”، والبوليس منظم حاضي الصغيرة والكبيرة والمراقبة كانت بالكلاب البوليسية كذلك.

الأعلام المغربية كترفرف فكل بلاصة، من لفوق لتحت الشارع للبرلمان، والناس كبار وصغار، رجال وعيالات، كلهم كيشاركو فهذ اللحظة الوطنية اللي كتأكد التقدير الكبير من الشعب للملك محمد السادس.

مع اقتراب الساعة ديال الخطاب، ناس بزاف كذلك كيتابعو التلفزة ، وكولشي كيهضر على شنو غادي يقول سيدنا فهاد الخطاب.

عيالات جاو من باب الاحد للشارع محمد السادس وهوما كيردد اغنية “زيد الملك زيد زيد”، وفق ما وثقته گود.

كاين كذلك سياق سياسي واقليمي ودولي جاي فيه الخطاب، بالاساس استمرار النجاحات الدبلوماسية والاعترافات المتتالية بمغربية الصحراء، وعودة الهدنة لغزة، هادشي دوليا.

وطنيا كانت حركة جيل زيد خرجت بمطالب اللي كتهضر على التعليم والصحة، وعلى الشباب والشغل، ولكن كاملين متفقين على حاجة وحدة: أن الخطاب ديال سيدنا دايماً كيكون فيه الأمل والتوجيه.

كانت كانت لوحة كتعبر على المغاربة بكل اطيافهم، المغاربة البسطاء، فيها حب وانتماء وفرحة، وناس كيجددو البيعة بالحضور والفرحة ديالهم .