سبور//

أكد أنوار الأموي أن ملعب طنجة الكبير، صافي راه واجد بعدما خضع لإصلاحات جذرية على جميع المستويات باش يكون محتارم معايير الاتحاد الدولي لكرة القدم ومونديال 2030.

ووضح أنوار الأموي في تصريح للموقع الرسمي للجامعة الملكي المغربية لكرة القدم، بلي تيران طنجة تمت توسعة الطاقة الاستيعابية ديالو وكبرت بعد الاشغال الاخيرة باش يولي يهز 75 ألفا و500 متفرج، وأن الملعب غايكون فيه صالون VIP اللي فيه 1300 د البلايص و VVIPاللي كايهز 210 بلاصة والمدرجات من المستوى العالي وأيضاً منطقة الصحافة اللي فيها 3000 بلاصة، وهذا الشي إلى جانب مميزات أخرى من الدرجة الرفيعة على 4 ديال الطبقات.

الملعب وحسب أنوار الأموي يتوفر على كل ما تحتاج الأندية والمنتخبات باش تلعب الماتشات ديالها، من فيستيير وغرف ديال الاستشفاء والماساج للرياضيين وصال ديال ليشوفمون بليماشين وكاينين 4 ديال الفيستييرات وهذا الشي على حساب الأنشطة ديال الاتحاد الدولي لكرة القدم “الفيفا”، إلى جانب Zone mixte و Salle de conférence وصال اخرى خاصة بالصحافة فين يخدمو الصحافيين وفضاءات الاتحاد خاصة بالمنظمين ديال الكاف والفيفا، وهذا الشي كل موفرة فيه شروط الراحة والخدمة حيث الصحافيين والمنظمين غايجيو يدوزو اليوم كامل فالتظاهرات الرياضية باش يخدمو.

ومن ناحية الأمن، أكد المهندس أنوار الأموي، أن التيران كل مؤمن مزيان، وفيه 900 كاميرا داخلية ونفس الشي على برا، واللي كايغطيو جميع مرافق ومداخل التيران، بآخر ما كاين من التكنولوجيا المتطورة لتأمين المتفرجين، وغرفة ديال المراقبة حتى متوفرة على أحدث ما كاين فهذا المجال، وهاذ الشي إلى جانب حوايج اخرين بحال الباركينگ VVIP اللي كايهز 400 عربة، والباركينگ ديال الجمهور اللي كايهز 3 آلاف طوموبيل والتيران فيه 12 مصعد.