كود سبور//

خرج المنتخب الوطني المغربي محتاسة منتخب الكونگو  اليوم الثلاثاء فتيران أكادير، ضمن الجولة 4 من اقاصائيات كاس العالم 2026.

وسالا الماتش بين المنتخب المغربي ومنتخب الكونگو بتقدم الأسود بنتيجة 6 لزيرو، وخرجو متقدمين فالشوط الاول بـ4 لزيرو ماركاهم كل من عز الدين أوناحي فالدقيقة 8، وشادي رياض فالدقيقة 16 وأيوب الكعبي فالدقيقة 20، ورجع زاد الهدف الرابع فالدقيقة 39.

وفالشوط الثاني زاد المنتخب المغربي 2 هدف ثاني، وماركا ايوب الكعبي الهدف الخامس فالدقيقة 53، وسفيان رحيمي اللي دخل فالميطا الثانية ضرب الهدف السادس فالدقيقة 62.

وقدم المنتخب المغربي ضد الكونگو ماتش مزيان ومستوى افضل من الماتش الماضي ضد زامبيا، مع الإشارة إلى أن وليد الركراكي دار تغييرات على التشكيلة الأساسية، من بينها شادي رياض وايوب الكعبي اللي لعبو رسميين وماركاو واللي شاركو بلاصة رومان سايس ويوسف النصيري.

وبهذا الرباح انفرد المنتخب الوطني المغربي بصدارة المجموعة الخامسة برصيد 9 النقاط، متبوع بالنيجر وتنزانيا برصيد 6 نقاط لكل منتخب، ثم منتخب زامبيا بـ3 نقاط، والكونگو 0 نقطة.