كريم الصوفي – كود//

[email protected]

قالت إذاعة أوروبا سور الإسبانية، أن عنصر تابع لـ”لاگوارديا سيبيل” في سبتة حصل فـ ضوصي ديال الاختلاس البسيط، بعد اعترافه أمام السلطة القضائية المختصة، وتحكم عليه بأداء غرامة مالية تقدر قيمتها بـ150 أورو، بعد  إلزامه بدفع مبلغ 5 أورو يوميا لمدة شهر.

وحسب المصدر ذاته، هاذ الحارس المدني كان كيفتش الكوفر ديال طوموبيل ديال أسرة مغربية بمعبر تراخال، ف نونبر الفايت، ولقا أن عندهم كمية ديال التمر فايتة المسموح بيها وصادرها من أجل إتلافها، لكن ف بلاصة ما ياخذها للمصلحة المكلفة بالإتلاف، شد الباكية ودارها وسط ثوب ودارها فالبيرو ديالو.

ومن الزهر ديال هاذ الحارس المدني تدار تفتيش داخلي فـ آخر نهار، وتلقات الباكية فـ الشكارة ديالو، وثبتات عليه التهمة بعد الرجوع إلى الكاميرات. وفتح تحقيق من قبل الوحدة العضوية للشرطة القضائية، التي أحالت القضية إلى محكمة التحقيق رقم 6 بسبتة.