الرئيسية > آش واقع > باقي  گاع ما بداو. المهنيين ديال الطرانسبور بروفيسيونيل فالصبليون معارضين استقدام شوافرية مغاربة وها علاش؟
01/03/2024 09:00 آش واقع

باقي  گاع ما بداو. المهنيين ديال الطرانسبور بروفيسيونيل فالصبليون معارضين استقدام شوافرية مغاربة وها علاش؟

باقي  گاع ما بداو. المهنيين ديال الطرانسبور بروفيسيونيل فالصبليون معارضين استقدام شوافرية مغاربة وها علاش؟

كود – كازا ///

استقدام شوافرية بروفيسيونيل من المغرب للصبليون داير حالة وسط المهنيين ف إسبانيا من شوافرية ونقابات وحتا المدارس ديال تعليم السوگان. عدد كبير منهم كيشوفو أن الشوافرية المغاربة ما كيخدموش ف المغرب بما يسمى التاكوگراف، اللي كيعتابروه من الأدوات اللي ساهمات بشكل كبير ف سلامة القطاع في إسبانيا وأوروبا.

وكيسمح هاذ الجهاز بتسجيل سرعات المركبات وفترات العمل والراحة على ديسك واحد خلال فترة 24 ساعة. وهذا مكان كيسمح بمراقبة تجاوزات السرعة وكذلك مخالفات السير.

مسؤول ف الاتحاد الوطني لجمعيات النقل ف إسبانيا، أشار إلى أن “العجز ف عدد الشوافرية كاين ف البلاد، ولكن من الضروري التأكد من استيفاء شرط  الحصول على الرخصة ف المغرب كما هو الحال في إسبانيا”.. أما مدارس تعليم السوگان بحال الرابطة المهنية لشركات التدريب في مجال الخدمات اللوجستية والنقل والسلامة على الطرق، كتشتارط ضرورة تدريب الشوافرية المغاربة قبل هاذ الخطوة..

وحسب تقارير إعلامية، كيتمتعو الشوافرية ديال الكاميوات ف إسبانيا  بسلوك  مثالي، من حيث  السلامة على الطرق. ف عام 2021، تسببو فقط ف 1.75٪ من الكسايد ف إسبانيا، و2.67٪ من القتلى ف الطرقان.

وف 6 فبراير الحالي، صادقات حكومة مدريد على تبسيط إجراءات الاعتراف بالبيرمي المغربي للشوافرية البروفيسيونيل ديال الكاميوات، حيث كان مفروض على المغاربة اللي كيبغيو يديرو المطابقة ديال بيرمي C (الشاحنة) وC+E (الشاحنة والمقطورة) إجراء اختبار نظري واختبار عملي.

وحسب المصادر ذاتها، يمكن دابا للمعنيين بالأمر يسوگو الكاميو ف إسبانيا لمدة ستة أشهر دون الحاجة إلى استبدال البيرمي. ووقعات إسبانيا والمغرب اتفاق ثنائي للاعتراف المتبادل ب البيرميات بلا الحاجة إلى إجراء اختبارات نظرية أو عملية.

موضوعات أخرى

22/04/2024 07:00

قاضي التحقيق بابتدائية سطات هبط موظف سجن عين علي مومن الحبس وها التهم للي توجهات ليه