كود -Ghana web//
تحول واحد الشاب من غانا، سما راسو “إيبوه نوح” لظاهرة فسوشلميديا، خصوصاً فتيك توك من بعدما خرج كيقول باللي هو نبي ومكلّف من عند الله باش يبني السفن للي غادي ينقذ بها البشرية من نهاية العالم، القصة ديالو انتشرت دغيا وخلّقات نقاش واسع بين لي مصدّقها ولي كيشوفها غير قالب باش يربح لفلوس.
إيبوه نوح قدر فمدة قصيرة يجمع كثر من مليون متابع فتيك توك، وبدّا كيروج لرواية اسمها ’’الطوفان العظيم”، وقال فيها باللي العالم غادي يتعرض لطوفان شامل فدجنبر 2025، وغادي يغرق كلشي، وما غادي يفلت منو حتى واحد إلا الناس اللي غادي يركبو فالسفن دياولو اللي قال باللي راه هو مأمور ببنائها، وزاد قال باللي هاد الطوفان غادي يدوم ما بين ثلاث حتى لأربع سنين.
ففيديوهات متفرقة، قال باللي 380 ألف واحد من أتباعو واجدين يتجمعو ويصلّيو ويسافرو معه هاد الكلام خلا بزاف ديال الناس يدخلو فحالة ديال الخوف والرعب حيتاش عدد كبير منهم صدّقوه، حتى أن بعضهم باع الديور والممتلكات ديالو، وشي آخرين عطاوه فلوس مقابل يضمنو بلاصتهم فالسفن، وما سالاش هادشي غير فغانا، حيث جاو أتباع حتى من دول مجاورة، دافعهم الخوف من النهاية والرغبة فالنجاة.
مني قرب التاريخ لي حدّد، تدخلات السلطات الغانية واعتقلاتو بتهمة نشر أخبار كاذبة وتضليل الرأي العام، قبل ما يتم الإفراج عليه من بعد، وقبل الاعتقال خرج بفيديو آخر قال فيه باللي إلا ما وقعش الطوفان فالوقت المحدد، راه هاد الشي معناه أن الله سامح البشر وغفر ليهم، وعلن أنه ناوي يدير احتفال كبير بهاد المناسبة.
موضوعات أخرى
باش توقف الحرب. رئيس ايران: منفتحون على محاولات الوساطة
الدوحة دانت هجوم إيراني على مبان فالبحرين فيها قوات قطرية
النهار السابع من الحرب… ها شحال ديال ناس ماتت حتى لدابا من إيران تال مريكان
