گود سبور//

خرج واحد الشخص كيقدم راسو على أنه من جمهور الجيش الملكي بوجه مكشوف كيهدد محمد بودريقة رئيس الرجاء الرياضي باختطاف ولدو والإفراج عليه مقابل خسارة الفريق الأخضر للقب البطولة الاحترافية، أو الاعتداء عليه حسب ما لمح بيديه بحركة على العنق فتلميح للذبح.

وخرج هاد الشخص لابس توني ووراه شعار فريق الجيش الملكي وهو كيطرح خطط لتتويج الفريق العسكري بلقب البطولة الاحترافية اللي منافسين عليها مع الرجاء الرياضي المتصدر، وقال للمشجعين ديال ليفار اللي متبعين الفيديو ديالو: “كاينة خطة اخرى نختاطفو ولد بودريقة وهادي الخطة B، وهي نختاطفو ولد بودريقة ونطلبو فيه فدية، ونتاصلو بباه نقولو له يا تخسر الرجا يا ولدك مشى وهاد الخطة راه حتى هي مزيانة فكرو فيها مزيان يا دراري”.

وتفاعلا مع هذا التهديد الخطير ديال هذا الشخص اللي كايدعي أنه المشجع ديال الجيش الملكي، خرج محمد بوديقة رئيس الرجاء الرياضي ونشر الفيديو على فيسبوك، وقال عليه: “هذا واش تمشي معاه الأخلاقيات أو الوكيل العام أو الفيفا بزاااااف…”.