اسماء غربي- كود//

المغاربة اللي لاباس عليهم معروف انهم كيرشيو وكيتدخلولهم وكيعطيو الزبابل دالفلوس باش ولادهم يقراو فالبعتات اللي بطبيعة الحال عندهم قيم ديال بلدانهم. وهادشي هاد الناس عارفينو. وهكاك نهار كيقريو ولادهم فالدرس شي لعبة فيها المثلية ولا العلمانية ولا غيرها كيخرجو يبكيو..

اخر خرجة هي ديال اباء وامهات التلاميذ ديال الليسي Louis Massignon فكازا، گالك اسيدي علاش دوزولهم مسرحية سميتها Au pied du grillage pousse un oranger اللي جاتهم  كتشيد بمجتمع الميم وبالمثلية.

وزادو فالبكا ديالهم، وقالو ان الواليدين كيحسو بالذهول والعجز امام هاد الحادثة اللي ماشي معزولة. وكتبو: أحداث أخرى مماثلة وقعات فالعام الدراسي السابق. وكيبان أن إدارة المدرسة غادية بعناد فهاد “الاتجاه”.

اللي كيضحك (ولا كيبكي) فهادشي، هو ان هاد الواليدين عارفين ان هاد المدارس تابعة لفرانسا ومتبعة مبادئ وافكار الجمهورية الفرنسية! يعني احترام حقوق الانسان كيف ما بغى يكون، لا للهوموفوبيا، الدين مايتدخلش فالدولة (la laïcité)، وزيد وزيد من القيم الكونية الزوينة.. وواخا هكاك نهار كيقريو لولادهم شي كتاب ولا قصة ولا مسرحية ولا فيديو فيها المثلية، كيخرجو زعما شوكي ودايخين ومافاهمينش!

واش كتقريو ولادكم فمدرسة ديال طالبان؟ لا! كتختارو تخسرو عليهم فلوس صحيحة باش تقريوهم عند الفرانسيس، عند العالم المتقدم، اوا الفرانسيس هما هادو، كيآمنو بهاد القيم (المتقدمة).

قريو ولادكم مع ولاد الشعب وهنيونا!