كود الرباط//
كشفت النقاشات لي دايرين گروب Gen212 ف ديسكورد، بلي كاينين أصوات باغين الإلتراس دخل معهم فهاد الاحتجاجات ومنهم لي بغا ينقلها للأحياء الشعبية والأسواق الشعبية باش ميتشدوش.
وجات هاد النقاشات بعدما فشلو شباب الحركة ينزلو بقوة للميدان لبارح، من غير بعض العشرات من الشباب المتمرد، مع وجود يساريين كيقودوهم وكيتزعموهم فحال كيف وقع ف رباط وكازا.
وحتى من الخطابات لي كاينة فهاد الكروبات، للي كيأطرهم هو دراري ديال أطاك المغرب وفيدرالية اليسار، وفالفايسبوك ومنصات أخرى كاين خطاب العدل والإحسان كيحرك فهادشي.
وحتى الندوات لي دارو هاد جيل، أطرهم أشخاص محسوبين على الفكر اليساري.
دبا دخلو الروابا ف الخط، طوطو وختك والمورفين وعدد منهم كيطالبو بإطلاق شباب لي تشدو وكيأيدو مطالبهم. واش هادشي غايزيد يكبر ولا غايكون الاستثناء المغربي حاضر مرة اخرى فعلاج هاد كرة ثلج ديال الاحتجاجات لي غادا وكتكبر.
لبارح، مكانوش اعتداءات من طرف السلطة، كانو توقيفات عادية وبشكل سلمي، وحتى المتظاهرين لي تشدو مداروش مقاومة ضد التوقيف.
