گود سبور//

غايكون المنتخب الوطني المغربي فـ المعسكر التدريبي ديالو بمركز محمد السادس فـ ظروف تدريبية على أعلى درجة من التركيز، استعدادا لكاس أفريقيا “المغرب2025″، اللي غادي تبدا يوم 21 ديسمبر الجاري، بماتش الافتتاح بين المغرب وجزر القمر.

وكشفت مصادر “گود”، أن لاعبين المنتخب الوطني المغربي اللي غادي يعيط عليهم الناخب الوطني وليد الرگراگي باش يشاركو فـ كأس إفريقيا “المغرب2025″، غادي يدخلو لمعسكر المنتخب الوطني واللي غادي تكون مفروضة عليه تدابير أمنية صارمة، باش اللاعبين يكونو فـ قمة التركيز ديالهم استعدادا لكأس أفريقيا، وكاينة تعليمات أمنية لتأمين محيط المنتخب الوطني المغربي، وحتى شي حد براني ما يدخل عندهم للمعسكر كيفما بغا يكون، وغادي تكون موفرة للاعبين والطاقم التقني كل حاجة غايحتاجوها خلال مدة المعسكر كامل.

وكايتسناو المغاربة يعلن الناخب الوطني على لائحة المنتخب الوطني المغربي المشاركة فـ كاس إفريقيا “المغرب2025″، مع العلم أنه كاينين شي لاعبين جاو للمغرب استعدادا لكاس إفريقيا بحال ياسين بونو، مازال اللاعبين الآخرين اللي ما غادي يقدر يجيو للمنتخب حتى ليوم 15 ديسمبر.

ويعتبر المنتخب الوطني المغربي من أبرز المرشحين للتويج بكاس إفريقيا “المغرب2025″، وكاين فـ الگروب الاول مع كل من جزر القمر، ومالي، وجزر القمر، والجماهير المغربي كاتسنى تشوف المنتخب المغربي وهو كايربح ثاني كاس افريقيا بعد 1976 الوحيدة فـ تاريخ المغرب.