وكالات//

الحكومة ديال الشينوا ناوية تعطي إعانات مالية سنوية للعائلات، فمحاولة مستعجلة باش توقف الهبوط المستمر فـ معدلات الإنجاب، اللي ولى كيشكّل خطر على مستقبل ثاني أكبر اقتصاد فالعالم.
وحسب ما جابت وكالة بلومبرغ من مصادر قريبة، الصين غادي تعطي مبلغ 503 دولار فالسنة على كل طفل تزاد من بعد 1 يناير 2024، حتى يوصل لسن ثلاث سنين.

هاد الخطوة داخلة فـ إطار مبادرة وطنية كبيرة، من بعد ما السياسات السابقة، بحال إلغاء قانون الطفل الواحد اللي تسالا تقريبا من عشر سنين، ما جابتش نتيجة فزيادة عدد المواليد. العام اللي فات تسجلو غير 9.54 مليون طفل، يعني تقريباً النصف مقارنة مع 2016، وهادشي كيبين باللي الرغبة فالإنجاب ولات ضعيفة بزاف عند العائلات.

نزول معدل المواليد ولى مشكل استراتيجي فالصين، حيت كيسبب فـ نقص عدد السكان اللي كيخدمو، وهادشي كيأثر على الإنتاجية، وكيدير ضغط كبير على نظام الرعاية الاجتماعية والاقتصاد.