كود هند لكلاوي مراكش ///

مهرجان مراكش الدولي للفيلم سالى ول البارح السبت 7 دجنبر 2024. مهرجان عندو جوج وجوه. وحدة للعالم فيها حضور وتكريم سينمائيين كبار بحال شون بين وكرونونبورك وتيم بورتون ومونيكا بيلوتشي…. فيه عرض افلام قوية ومناقشات سينمائية وفيه وجه اخر نقدرو نسميوه وجه تيك توك. هاد لوجه هو اللي كيبان مهيمن دابا. 

لوجه تيك توك فيه فنانة جايبين ماواتهم وولادهم وجيرانهم. فيه ممثلات وممثلين ما عمرهم دارو شي فيلم وكيتندرو فالطابي روج. فيه ممثلين وممثلات كيهدرو على كلشي الا السينما.  غالبيتهم ما كيشوفو لا افلام لا يشاركو فمناقشات. 

عندهم ربع ساعة المجد ديالهم هي ديك اللحظة باش يلبسو ويتبنددو فالطابي روج. 

تصورو مهرجان كيسهل لعدد من الممثلين والممثلات باش يتعاطاو. شي يكلاشي شي. ماشي فالسينما ولا الابداع. للا. ولى مهرجان الطلاق والنفقة ورضاة الوالدين. المشاكل الشخصية بلاصتها ماشي مهرجان تجيب عائلتك وفابور

هاد لوجه ولى هو المهيمن على المهرجان. دابا باش تشوف تصريحات نشراتها وكالة المغرب العربي للانباء للممثلين لمغاربة على المهرجان كتضحك. ضحك كالبكاء. كتحس بالغالبية ديالهم عطاوها للشفاوي. ما شافو افلام ما حضرو ماستر كلاس. ما دارو لقاءات مهنية ليهم. عطلة وصافي.

عدد قليل من الممثلين والممثلات مدمنين علي حب الفن السابع. ولكن قلال قلال. 

فهاد الظروف تقدر تلقى تفسير من تفسيرات اخري٬ لخروج عدد من الجمهور من قاعة سينمائية فهاد الدورة اثناء عرض فيلم “ميلك” اللي لعب بطولتو شين بين. الفنان كان حاضر فمراكش وتم تكريمو. 

مهرجان مراكش بعد 21 دورة ما قدرش يخلق جمهور يحب السينما. يحب هاد الابداع. وكأن هاد المهرجان خلق جمهور التيك توك ماشي جمهور هاد الفن الجميل. 
مهرجان كيعطي للفنانين والصحافيين 10 ايام اقامة وماكلة وشراب ما يمكنش يكون ناجح. ناخدو قدوة المهرجانات لكبار. بغيتو الصحافة تكتب على السينما والافلام٬ كيديرو عملية انتقائية اولية كيف كيدير مهرجان “كان” العالمي. كل صحافي طلب الاعتماد كيرسل اش كتب على المهرجان. تنتاقد ماشي مشكل. المهم كتكتب علي السينما. على الابداع. وعليه كتاخد الاعتماد اللي كيعطيك دخول الافلام والمناقشات. بالنسبة للاقامة تكلف بيها مؤسسات اعلامية. كل مؤسسة رسلات صحافي تتكلف بيه. اللي يقدر يكون هو المهرجان يشوف مع اوطيلات دير تخفيض ولكن لخلاص على المؤسسات. 
مهرجان مراكش ما باغيش هاد الشي. كيدور فحلقة مفرغة. الفرقة اللي كاينة خاصها تتبدل من الفوق للتحت. خاص تجي فرقة ترجع مراكش لسكة السينما