كود هند لكلاوي ///

المركز السينمائي المغربي كتب فالموقع الرسمي ليه باللي “ستحل المملكة ضيف شرف على السوق الأوروبية للفيلم في الفترة ما بين 12 و18 فبراير 2026، ضمن برنامج morocco in focus 2026 للمشاركة في السوق الأوروبية للأفلام (EFM) ”

واضاف باللي ختار لائحة من “10 أسماء مغربيّة وذلك “عقب طلب عروض أطلق خلال المهرجان الوطني للفيلم بطنجة في نسخته الأخيرة، كلاً من علاء الدين الجم، وكريم دباغ، ومريم عدو، وأميمة زكري أجراي، وفيصل القديري، وإلهام رؤوف، ولطفي أوخيار، ورشيدة السعدي، ولمياء الشرايبي، وخديجة علمي، حيث سيستفيدون من مواكبة مهنية ولقاءات استراتيجية لتعزيز حضور السينما المغربية في المنظومة العالمية”.

اولا بالنسبة لكلمة ضيف شرف”, راه غير غميق. المغرب خلص باش يدخل سوق مهرجان برلين ماشي عرضو عليه. ضيف شرف كيكون باش مهرجان كيعرض عليك وعلى سينما بلادك ماشي باش تجيب “سلعتك”. دابا هاد لخلاص غادي يرجعو محمد مهدي بنسعيد وزير الاتصال الوصي على القطاع، انتصار وغادي يسوق باللي كيدافع على الابداع المغربي وداك لكلام الخاوي. ولا يخرج رضى بنجلون مدير المركز السينمائي المغربي اللي ما يستحقش هاد البوسط، يبدا يسوق “انتصارات” وهمية للسينما المغربية

بالنسبة للقضية الثانية اللي كتهم شكون ختارهم بنجلون. فالبيان قال ليك راه كانت طلبات عروض وتم اختيار 10 منتجين. راه منشورة سمياتهم. نخليو صحاب السينما يقولو لينا شكون هادو واش كيديرو للسينما. فيهم اسماء دارت واخرى والو.

نشوفو وحدة بحال خديجة العلمي اللي سبق لمهرجان مراكش يكرمها. هادي منتجة منفذة كتخدم مع الانتاجات الدولية اللي كتصور فالبلاد. عطيوني فيلم واحد مغربي نتجاتو هاد السيدة. يمكن ختارها بنجلون لانها كانت “منتجة منفذة” لسلسلة بوليسية دار ليها الاخراج نور الدين لخماري. المنتج الحقيقي ديالها هي “دوزيم”