الرئيسية > آش واقع > باش ماينتشرش “كورونا”: الجالية المغربية ف الطاليان حيدات صلاة الجماعة ف الجوامع
26/02/2020 10:30 آش واقع

باش ماينتشرش “كورونا”: الجالية المغربية ف الطاليان حيدات صلاة الجماعة ف الجوامع

باش ماينتشرش “كورونا”: الجالية المغربية ف الطاليان حيدات صلاة الجماعة ف الجوامع

عفراء علوي محمدي- كود//

قال مهاجر مغربي، خدام فسبيطار كودونيو اللي بان فيه فيروس كورونا المستجد (كوفيد 19) لأول مرة فالطاليان، بللي هذ المدينة ولات مهجورة تماما والحركة فيها توقفات.

المغربي رسل أوديو على تطبيق “واتساب” وتعمم بشكل كبير، كيأكد فيه بللي السبيطار اللي خدام فيه “ولا شبه مسدود، جميع المحلات مسدودة والمدارس والمطاعم، وكاينين أوامر باش كلشي يبقى فدارو ومايخرجش منها، باستثناء العاملين فمجال الصحة بحالي أنا اللي كنقوم بالتعقيم”.

وعلى حسب كلامو، هذشي كينطبق كذلك على المدن والقرى المجاورة، وخصوصا كازابوسترلينكَو وبياتشنسا “هذ المدن ولات مدن أشباح، والتران مابقاش كيوقف فيها، والبوليس ولاو كايدورو على الحوانت باش يسدوها، وخروج الناس من منازلهم ممنوع، وإلى كان للضرورة القصوى لازم وضع الماسكات”، على حد تعبيرو

وحذر المهاجر المغربي من التجمعات البشرية، وقال بللي اللي بغا يصلي يصلي فدارو حسن ليه، ويتجنب شريب الما من الكيسان البلاستيكية اللي كتتفرق حدا الجوامع.

وللإشارة، إيطاليا عزلات 11 لمدينة بعد انتشار فيروس “كورونا” فيها، اللي قتل 11 دالناس، وتصابو بيه كثر من 320، حسب آخر إحصاءات رسمية.

موضوعات أخرى

09/04/2020 19:57

حصيلة كورونا فالعالم هذ النهار: ميريكان تجاوزات 22 ألف إصابة اليوم وسبقات سبانيا فالوفيات وفرانسا باطات الركور وسجلات 1341 وفاة ف24 ساعة والإصابات فبريطانيا وتركيا كيرتفع