كود هند لكلاوي وهناء ابو علي ///

فالمغرب عارفين ومتأكدين باللي هاد القضية ديال العزل الذاتي التلقائي ما يمكنش نديروه. كاين اسباب كثيرة. فكازا الناس ساكنة فبيت او جوج بيوت. كيفاش غادي يدار هاد الحجز فالاسر البسيطة وحتى اللي شوية متوسطة. ثانيا التقاليد فمجتمعنا كتغلب على كاع الاحتياطات. “كنت فالتنفس الصناعي الاختراقي فمصحة كازاوية معروفة. تحسنت شوية وجاو عندي صحابي من ميادين مختلفة وكلهم محسوبين على الناس اللي عندهم الوعي. اييه جاو وما خافوش من العدوى” يحكي انس 45 عام رجل اعمال بيضاوي ل”كود”.

هاد رجل الاعمال قاوم الموت وشافو حداه فالغرفة اللي كان فيها. استغرب كيفاش صحابو اللي عزاز عليه ما خافوش على ريوسهم. اما علي 39 عام وكيخدم فالقطاع الخاص فاكد ل”كود” باللي ضارب مع امو باش ضرباتو كورونا ومع عندو الضغط تكرفص ودارو ليه التنفس الصناعي الاختراقي حتى هو “امي تخاصمات معايا. حقاش قبل ما يديرو لي التنفس وكنت فحالة مركفصة بزاف جات بغات تشوفني. رفضت وما مخليتهاش تدخل. باش نقزتها وخرجت تخاصمات معايا. لحد الان ما فهماتش علاش ما خليتهاش تشوفني”.

علي اكد ل”كود” باللي كان صعيب بزاف ليه يمنع ناس من عائلتو يجيو يشوفوه او حتى يعنقوه “باش تخاصم مع امك باش تحميها كتولي تخاف ضيع كاع العائلة. الناس كتجي تشوفك بحال ايلى فيه مرض عادي ماشي فيروس قاتل لفئات بحالي وبحال اللي فيهم السكر واللي سنهم شوية كبير” يضيف علي ل”كود”.

اللي تناشر فهاد الفترة ماشي غير يجيو يشوفو الناس فبعض المصحات الخاصة٬ كاين اللي كيسمع شي حد مريض فيه كوروما واخا ماشي فالصبيطار كيجيو عندو يزوروه “جداتي كبيرة شوية فالسن. جاتها كورونا.. ما كانتش عندها امراض مزمنة وما دخلناهاش للصبيطار. وصلات لخبار عن طريق واحد بنت عمتي ما كتسكتش شوية بداو كيجيو عندنا الناس. تصور ناس من العائلة ركبو فالطوبيس وجاو من حي بعيد باش يشوفو جداتي اللي حنا ما كناش ندخلو عندها للبيت” تحكي حياة ل”كود”.

هاد الجدة كتسكن فحي القدس فالبرنوصي. جاو عندها ناس من الحي المحمدي وسيدي عثمان اما فطاكسي كبير او طوبيل او الترام او فيهم كاملين فشي حالات. تصورو باش رجعو واكيد فشي حد فيهم الفيروس لشحال من واحد غاديين ينقلوه.

مع هاد الحالات يصعب بل يستحيل ماشي غير وقف العدوى بل معرفة المخالطين. حقاش ولات بؤر عائلية. احد الاطباء اكد ل”كود” باللي اللي كينقل العدوى فكازا اليوم ماشي اللي خدامين فالمعامل ولا اللي كيبيعو ويشريو٬ اللي كينقلها فالمرتبة الاولى هما اللي ايلى بقاو فدارهم فحجر صحي شامل ما يخرجوش٫ ما غادي يوقع والو. ما كيخدمو فمصانع لا معامل ولا مكاتب. كاين فيهم اللي كيظل يدور وفهاد الدوران كينقل الفيروس. كما اكد ان شي قهاوي خاصهم يتسدو. ولاو حاضنات لكورونا وبدون احترام للمعايير اللي دارتها وزارة الصحة.

البارح الخميس 5 نونبر تسجل فالمغرب 5641 حالة فكورونا فيروس ومات 77 مغربي بهاد الڤيروس اللعين. غير كازا اكبر مدن المغرب تسجلات فاحياءها 1936 حالة وقتلات كورونا 26 كازاوي. رقم قياسي فالاصابات. بهاد الارقام وصلنا ل874 اصابة خطيرة وحرجة. غير ف24 ساعة تزادت 80 حالة خطيرة. من هاد الرقم 64 حالة تحت التنفس الصناعي الاختراقي. يعني وصلنا الان من هاديك 874 حالة ل487 حالة تحت التنفس الصناعي الاختراقي. يعني عايشين بالتنفس بعد ما ضرب الفيروس الرئتين. هاد الارقام كدير ضغط كبير على المستعجلات. دابا وصلنا ل36 بالمائة كمعدل لنسبة ملء الاسرة الخاصة بكورونا فيروس.

هاد الشي كيخلع ولكن لمغاربة ما مسوقينش. ناخدو الدار البيضاء اللي كيتسجل فيها ارقام كل نهار كثر من اللي سبقو. لقهاوي عامرين والاسواق كثر والناس كتحرك وكأن المرض ما كاينش. وزير الداخلية عبد الواحد لفتيت قال هادي يومين فالبرلمان باللي كازاوا ما مساعدينش الدولة فالحد من انتشار هاد الفيروس.

المديرة الجهوية للصحة بالدار البيضاء الدكتورة نبيلة ارميلي كانت اكدات هادي شهر فحوار مع “كود” باللي دابا باللي كاين انتقال عدوى جماعي للفيروس. دعت للاحتراز وقالت باللي “اليوم باش نوصلو لمرحلة انتقال الفيروس عبر الاشخاص وما كنعروفش شكون كيعادي شكون٬ خاصنا نكونو اكثر حذر ويقظة. لكن كبيضاويين اولا ومهنيين فقطاع الصحة نلاحظ ان نسبة اليقظة تراجعات شوية٬ بل هناك من يقول ان هاد الفيروش اصلا ما كاينش وكاين اللي كيعتاقد ان هاد الفيروس بعيد عليه وما غاديش يجيه… في حين ان هاد الفيروس ما كيعزلش شكون يقيس وشكون اللا”.

هاد الشي راه شهر الطيب حمضي، طبيب وباحث في السياسات والنظم الصحية٬ طالب ب”العزل الذاتي التلقائي داخل الاسر” واكد انو صعيب تجاوز الوضعية الوبائية فالدار البيضاء “بدون حجر صحي مُوَجَۜه بالبيضاء لأربع او ست أسابيع على الأقل”

الطبيب الباحث هدر على التحديات ولكن شدد على ان “الكثير من الناس يتصرفون وكأن الوباء مرض ينتشر في الهونولولو، ولم يدخل مدنهم بعد، بل لن يدخلها رغم ما يرون من ارقام ووفيات امام اعينهم بل تحصد اقربائهم ومعارفهم. هده مشكلة كبيرة”ذكر بدارسة امريكية فيها ان “المصاب بكورونا ينقل المرض الى ازيد من نصف أعضاء اسرته، وان ثلاث ارباع هؤلاء يصابون في الخمس أيام الأولى من الإصابة الأولية، وان الأطفال اقل من 18 سنة ربما ينقلون الفيروس داخل عائلاتهم مثل الكبار”