كود -وكالات//

فالوقت اللي كتعيش فيه صناعة المسلسلات القصيرة فالشينوا واحد الإقبال كبير، تهز الوسط الفني فـ2026 على قبل الممثل الشاب “تشونغ يوفي”، اللي فعمرو 23 عام. هاد الفنان صدم المتابعين ملي هضر على ليعاشو فكواليس تصوير مسلسل بعنوان “الأمير الساقط”، بعدما لقى راسو مضطر يصوّر كثر من 60 مشهد ديال البوسان.

تفاصيل القصة بدات ملي قررات واحد المستثمرة مرفحة من إقليم “تشجيانغ” تحط فلوسها وتُمول هاد العمل القصير ،ولكن الطموح ديالها ما وقفش غير فالتمويل وإنما فرضات راسها هي البطلة ديال المسلسل فدور “الأميرة”، واختارت الشاب “تشونغ” باش يكون هو الشريك العاطفي ديالها قدام الكاميرا.

السيناريو فالأول كان فيه غير شي 10 ديال المشاهد ديال البوسان، ولكن هاد العدد ضوبل بشكل غريب ومفاجئ بسباب التعديلات اللي كانت كتفرضها المستثمرة كل مرة، حتى وصل كتر من 60 مشهد، وتحول العمل من قصة رومانسية لوسيلة لتلبية رغبات شخصية.

“تشونغ يوفي” أكد أن هادشي فات حدود التمثيل المهني، وكشف أن هاد المستثمرة كانت كتكتر عليه حيث كانت كاتبوسو بلا ماتعلمو وفشي مرات كانت كتشدو من راسو ملي كان كيحاول يبعد عليها.

الممثل الشاب قال إنه مايعرف مايدير بسباب الخوف من “الانتقام المهني”.وهي العقوبة اللي تقدر تنهي المسار ديال أي فنان صاعد فالبداية ديالو.

التقارير كشفت حتى على أن المخرج وبعض أفراد الطاقم عبروا على الاعتراض ديالهم من على هاد الممارسات وعلى كثرة المشاهد الحميمة اللي ما عندها حتى مبرر درامي، ولكن النفوذ وسلطة المال فرضات كلمتها فاللخر وما تبدل والو. واخا هكاك، منصة البث الرقمي دخلات على الخط من بعد، وقررات تحيد وترفض كثر من 20 مشهد من النسخة النهائية اللي غتتعرض.