سهام البارودي- كود//

كاين شي بنادم كايشوف الحياة بواحد السطحية سعداتو بيها ! يصحابو الحياة كاتحد فالماكلة و الشراب و بطاطا و الفلفلة ! هادوك بالضبط هوما لي كايقوليك مابغيناش موازين، جمعو فلوسو و عطيوهم للفوقارا ! و كايعطي لراسو لاليجيتيميتي باش يهضر بإسم المغاربة كاملين !
آ سيدي انا كمغربية باغا يبقى موازين و ماشي بوحدي كاينين بزاف ديال المغاربة شباب و شياب كايفرحو بموازين و كايمشيو ليه كايفوجو فيه.

راه شرف كبير للمغرب ينظم مهرجان فحال موازين، و المغاربة نورمالمون خاصهم يكونو فخورين بهادشي و يخرجو عينيهم فطيور الظلام كارهي الحياة و الفن و دوك البؤساء لي باغين يحاربو موازين ! ايه خاصك كمغربي تكون فخور بلي بلادك قدرات تجيب ليك فنانة عالميين كبار فحال ريهانا و ستينغ, شاكيرا، كارلوس سانطانا، دوك لي غناو گانگام ستايل… و اللائحة طويلة طويلة بزاف. شوفو غا فجنابكم واش كاينة شي دولة فالمنطقة ديال شمال افريقيا كاملة قادة تنظم مهرجان بهاد الحجم ! وا مصر لي مصر و ماقاداش، افريقيا كاملة مافيهاش دولة قادرة تنظم مهرجان فحال موازين و تجيب ليك فنانة من العالم كامل باش براهيم ولد جي سانك فالرباط و سكينة بنت الساكنية فالقنيطرة يقدرو حتى هوما يحضرو لريهانا و شاكيرا و هيفاء وهبي واخا غا مرة وحدة فحياتهم كاملة.

راه ليس بالخبز و المرقة وحدهم يحيىى الانسان ! وا هادوك لي كايصحابهم راه الفلوس ديال موازين لاشديناهم و فرقناهم على الفوقارا راه غايتحلو المشاكل! وا السطحيين وا وكّالين الرملة وا لي الريح لي جا يديهم، الحياة راه مابقاتش غا فالماكلة و الشراب و السكنة، المغاربة راه محتاجين يفوجو، محتاجين للفن فحالي محتاجين للخبز و السبيطار ! فحال فحال و فنفس المستوى !

و الفوقارا راه ديما غايبقاو و ديما غايكونو هادي هي سنة الحياة، ماغاديش نبقاو حنا غا مقابلين الفوقارا و حابسين المهرجانات و حابسين الاستثمارات و حابسين التفواج و حابسين الغنا و الشطيح و الرديح تايساليو الفوقارا حيت ماعمرهم ماغايساليو !