وكالات//

فواحد العالم اللي بزاف د الناس كايظنّو باللي ولى مكشوف كامل، فاجأ الناشط البيئي الأمريكي بول روزولي الجميع بمفاجأة قوية، من بعد ما كشف على أول تسجيل مرئي عالي الجودة (HD) لقبيلة بدائية كاتعيش فغابات الأمازون، وبعيدة كلياً على أي مظهر من مظاهر الحياة العصرية.

وخلال الاستضافة ديالو فبودكاست “ليكس فريدمان”، حكى روزولي تفاصيل أول لقاء وصفو بـ“الغريب والمريب”، وقال باللي التصوير تدار من مسافة آمنة كتقارب 100 متر، وسط صمت وترقّب كبيرين، ووضح أن التوتر كان حاضر بقوة، حيت كان الخوف من يتعرّض الفريق ديالو لسهام مفاجئة.

ووصف المشهد وقال: “فجأة كتبدأ تسمع الصراخ، والعيالات كيهزو الدراري وكيهربو نحو الأكواخ”، وهاد ردّ الفعل الأولي كيعكس الرهبة ديالهم من العالم الخارجي.

وأكد الباحث الأمريكي باللي عدم الاقتراب من القبيلة ما كانش غير لأسباب أمنية، ولكن حتى لحماية هاد السكان من “فيروسات قاتلة”، حيث أنهم ما عندهمش احتكاك مع البشر، وما عندهمش مناعة ضد الأمراض الشائعة، وهاد الشي كيجعل أي تماس مباشر خطر كبير وقد يهدد وجودهم كامل. وبهذا السبب، تكتّموا بزاف على الموقع الجغرافي الدقيق ديال المستوطنة باش ما يوصلوش ليها الفضوليين.