كود – وكالات //

الرئيس الأمريكي دونالد ترامب صرح اليوم السبت أن الولايات المتحدة دارت “ضربة كبيرة ومتقونة” على فنزويلا واعتقلات الرئيس نيكولاس مادورو مع مرتو، وتنقلو برا فنزويلا، العملية كانت بتنسيق مع الأجهزة الأمريكية باش ينفدو القانون، ترامب واعد بكشف تفاصيل أكثر فمؤتمر صحفي ف العشية على هاد الموضوع فمنتجع مارالاغو.

نائب وزير الخارجية الأمريكي، كريستوفر لاندو، وصف الوضع بـ”فجر جديد” لفنزويلا وقال أن مادورو غادي يواجه العدالة على جرائمو. مصادر إعلامية قالت إن الاعتقال تم من طرف قوات دلتا، وحدة النخبة فالجيش الأمريكي، اللي نفذت العملية.

الحكومة الفنزويلية من جهتها علنات على حالة الطوارئ وفعلات خطط الدفاع الوطني، ووزير الخارجية إيفان خيل قال إن أي محاولة لتغيير النظام غادي تفشل، ونائبة الرئيس دلسي رودريغيس قالت إنهم ماعارفينش بلاصة مادورو ومرتو وطالبو الأمريكيين يورّيو دليل على أنهم على قيد الحياة.

الرئيس البرازيلي عارض الهجوم العسكري ديال أمريكا على فنزويلا واعتقال الرئيس ديالها نيكولاس مادورو، وقال بلّي هاد الشي “خطأ ما مقبولش”، لولا كتب في منشور على موقع إكس: “هاد الأفعال كتمثل استهتار خطير بسيادة فنزويلا وكتشكل سابقة خطيرة بزاف على المجتمع الدولي كامل”. لولا قال قبل هادشي بلّي أي تدخل عسكري في فنزويلا غيكون “كارثة إنسانية”، وعرض البرازيل باش تتوسط فالصراع بين البلدين.