گود – وكالات//

خسر بابات المغنية الراحلة إيمي واينهاوس لي ماتت ف 2011 دعوى قضائية كان رفعها ضد جوج من صحاباتها، حيث تهمهم ببيع عدد كبير من أغراضها الشخصية بطريقة ماشي قانونية، القضية تشدات فالمحكمة العليا ف لندن، وكتعلق بـ150 بياسة ديال الحوايج والإكسسوارات اللي تباعت بين 2021 و2023، من بينها صيكان وخواتم وسناسل ديال إيمي.

الأب ديالها، ميتش واينهاوس، قال بلي الفلوس اللي تجمعات من المزاد وصلات تقريباً لـ840 ألف يورو، خاصها تكون من حق العائلة، وخصوصاً باش يتبرع بجزء منها لمؤسسة خيرية ديال إيمي، ولكن القاضية حكمات ضدو، وقالت بلي ما كاينش دليل على أن البنات خباو عليه البيع.

المحامي ديال الدفاع قال بلي أغلب الحوايج كانت إما كادويات أو سلف من إيمي لصحاباتها، وما كاينش دليل على العكس، فالأخير، المحكمة اعتبرات أن لي وقع ما فيهش شي مشكل.

الصحابات عبرو على الارتياح ديالهم للحكم، وقالو بلي العلاقة ديالهم مع إيمي كانت مبنية على الثقة والصحبة.