احمد الطيب كود الرباط//

سيدنا ديما كيطبق القانون وحريص عليه وملتزم بتطبيق الدستور، هنا مغاديش نذكرو الأدلة والأمثلة على ذلك لأنها معروفة، ولعل أبسطها أنه كيوقف فالضوء الأحمر فالطريق. نفس الشيء لولي العهد مولاي الحسن للي شفتو شخصيا وقف فحي أكدال فالضوء الاحمر وبشكل عادي حدا رباط سانتر. معرض هذا الكلام هو واحد الفايسبوك كيقدم راسو اعلامي ولا مؤثر ولا ناشط فنقل الاخبار و”كوبي كولي”، كتب فالصفحة ديالو كلام خطير عن العائلة الملكية، وقال بلي واحد من أفراد العائلة الملكية تدخل ولقن دروس لواحد مول بار معروف فالرباط، فاش مبغاش يخلي بنات محجبات يدخلو لهاد البار لي كيدير السهرات والشطيح والنشاط.

الخلاف بين البار وبنت هاد المدون كيف كتبين صورة السكرين، هو أن “عشية حفل زفافها، دعت بنتو صديقاتها اللواتي جئن من فرنسا و كندا و أمريكا لمشاركتها فرحتها مساء أمس إلى عشاء في مطعم مغربي متخصص في المطبخ الآسيوي اسمه “مطعم شوكو” في منطقة بئر قاسم بمدينة الرباط بعد إجراء كل الحجوزات الضرورية “.

.قاليك مطبخ اسيوي، رغم انه معروف بلي بار وفيه الطايح كثر من نايض وزوين بزاف حيث فيه النشاط والرقص. وجاء في تدوينة اومسى :”عند مدخل المطعم، جرى منع أربع صديقات ابنتي ممن يضعن الحجاب من الدخول بحجة أن “الحجاب ممنوع حفاظا على مشاعر زوار المطعم الأجانب ” ، و قد شعرن بصدمة لا توصف حين اشترط عليهن المطعم نزع حجابهن مقابل السماح لهن بالدخول وزاد :”شكرا لأحد أفراد العائلة الملكية (لن أذكر اسمه حفاظا على الخصوصية و قد كان موجودا بالصدفة) الذي تدخل و لقن صاحب المطعم درسا في احترام الحجاب وجعله يتوسل ويعتذر للضيفات المحجبات”.

يلا كان شي حد كيحترم القانون، هو انه فهاد الحالة كيتم استدعاء مفوض قضائي كيعاين الواقعة ويمشيو للقضاء يلا حسو براسهم متضررين (المحجبات طبعا)، وممكن يديرو شكاية لسلطات إنفاذ القانون، وديك السلطة دير خدمتها. ولكن باش يقول واحد من أفراد العائلة الملكية تدخل. فراه محاولة لإقحام عائلة ملكية فخلاف مدني بين جوج اطراف هوما البار والمحجبات.

ثم الحجاب ماشي لباس مغربي راه دخيل علينا. راه ايلي مشى شي راجل بجلابية اللي هي مغربية اصيلة غاديين يمنعوه حقاش كل محل كيعطيه القانون يدير شروط لدخولو. كاين اللي كيمنع الشورط وكاين اللي كيمنع الكاسكيط وكاين اللي كيمنع التقزاب وكاين اللي كيمنع ماليات الزيف. فين المشكل. هاد بنادم كيعرف باللي فدول العالم من الخليج حتى امريكا كاين مطاعم عندها نوع من اللباس كيسمح بيه واخر ما يمكنش تدخل بيه.

المشكلة اليوم هو شكون هادا للي كيقول من الاسرة العلوية وكيخالف القانون. دخل وطبق القانون براسو. هادا خاصو يتعاقب ايلى كان ولا ما كانش خاص محاسبة هادا اللي كتب هاد الشي