سهام البارودي – كود//

كانشوف شي استعمالات للعلم الوطني فالسوشل ميديا شي مرات كاتخليك تحس بلي العلم الوطني كايتمرمد فحال شي شيفون، لي رشقات ليه يدير بيه شي حاجة كاينوض يديرها بلا موجيب الشرع !

ايه المسألة كاتبقى حرية شخصية و گاع الدول الديموقراطية كاتعطي مساحة كبيرة للناس دير لي بغات بالعلم، تفصل منو تا گرصون و لا زيف ديال الكيسان و لكن حنا ماشي ميريكان، حنا غا ناس دراوش و عندنا بزاف ديال الهبّال مايمكنش تخليهم يديرو مابغاو.

العلم الوطني راه ماشي شيفون، ماشي ديكور، ماشي طرف ديال الثوب عادي، راه رمز من رموز الوطن، شي حاجة ديالنا كاملين و كاتجمعنا كاملين داكشي علاش خاص واحد المينيموم ديال الاحترام و التوقير ليه.

خاصنا نسولو راسنا: واش نبغيو الناس تضحك ولا تشوف الراية ديالنا بمنظور تافه؟ واش هادي هي الطريقة اللي كنفتاخرو بيها بهويتنا ؟ واش نبغيو شي واحد ينوض يدير الضحك فالعلم الوطني ؟

طبعا لا، العلم خاصو يبقى مصون و محترم و فبلاصتو، ماشي حاجة نتسلو بيها، ولا نطيحو بها القيمة. وهادشي ماشي ضد حرية التعبير، ولكن مع حرية التعبير المسؤولة، اللي كتفرق بين الابداع وقلة الاحترام.