ايلى ما تبدل والو فشهر موحالش نوجدو مزيان تنظيم مونديال 2030 اللي خاصو جيل جديد. ما يمكنش بوزراء بحال لفتيت وبايطاس ومزور وعمور المنصوري ولا ولاة بحال ديال كازا ولا الراشيدية ولا الداخلة نوجدو بيهم المسقبل. ما يمكنش بحال لعرايشي ولحليمي ولجواهري نشوفو فحدث غادي يغير مسقبل بلادنا

كود هناء ابو علي ///

كلنا مازال ما استوعبناش مزيان اش كيعني تنظيم مونديال 2030. كلنا مازال سكرانين بالفرحة. الحدث راه كبير. راه فيه 101 ماتش غادي يتقسم بينا وبين الصبليون والبرتغال. يعني ممكن يكون فبلادنا كثر من 30 ماتش فالمدن الست: طنجة والرباط وفاس والدار البيضاء ومراكش واكادير.

مونديال خاصو اطوروتات. خاصو ترانات. خاصو تي جي في. خاصو مطارات مقادة. خاصو صبيطارات. خاصو وسائل نقل عمومية متطورة. خاصو اوطيلات. خاصو مطاعم. خاصو عرض سياحي متنوع بزاف. بلا ما نهدرو على الجانب الامني …

راه الحدث اللي كاع العالم كيشوف فيك لاكثر من شهر. كيتبع الشادة والفادة. يعني كلشي خاصو يكون مقاد

هاد الشي كولو وقدامنا غير 7 سنين. راها قليلة بزاف بزاف. كازا مازال ما تحفرات حتى الحفرة الاولي للتيران ديالها.

هاد الشي ممكن يدار ويغير وجه بلادنا ولكن بجيل جديد. اليوم خاص تعيين ولاة اولاد الوقت. والي بحال ديال الدار البيضاء ولا هاداك ديال الراشيدية اللي دار زبايل بزاف فالعيون وجازاوه بهاديك الجهة٬ ولا حتى ديال الداخلة اللي خاصو يكون مشى يرتاح فدارو حقاش وصلو التقاعد٬ هادو ماشي ديال مرحلة بناء بلاد فظرف قياسي.

ولكن قبل الولاة والعمال اللي خاص يجيو ويكونو قافزين٬ خاص تغيير وجوه فهاد الحكومة. راه ما يمكنش يدار مونديال بوزير الداخلية الحالي لفتيت. ديما خاص وزير الداخلية يدوز 5 سنين او اقل ويتبدل. منصب حساس ولا طول فيه راه كنوجدو بصري جديد.

ماشي غير لفتيت اللي خاصو يتبدل. هاد الحكومة خاصها تكون مركزة بزاف. خاص بروفيلات ديال مونديال 2030. بحال وزيرة السياحة فاطمة الزهرا عمور ما صالحاش. لا هي ولا هاديك مزور غيثة الوزيرة المنتدبة مكلفة بالانتقال الرقمي وإصلاح الإدارة. تمشي تديها بحياتها الخاصة. هي ضعيفة والفرقة اللي معايا مطحطحة. هاد الحكومة الجديدة ما خاصش يكون فيها لا بنعبد الجليل ديال النقل ولا رياض مزور ديال التجارة ولا فاطمة الزهرا ديال السكنى ولا بايطاس مصطفى احد افشل وزراء هاد الحكومة. جا يدير التواصل ولى مقابل راسو. يمشي يكمل تكوينو باش يولي محامي اللي طفرو فهاد المهنة. ما يمكنش يكون عندنا مونديال 2030 بوزير خارجية بحال بوريطة. همو صورتو. ولا هاديك بنعلي ليلى وزيرة الطاقة. ولا وزير الصحة خالد ايت طالب. خاص اطر جديدة. شوفو الشوهة ديال 16 مغربي تعماو وهو تابع لي البق ففرانسا. طاح علينا البق بصاح

خاص جيل جديد قافز وكيخدم مزيان. خاص حكومة كوموندو. راه مستقبل بلادنا هادي.

حتى مناصب كبيرة بحال بنك المغرب ولا مندوبية التخطيط خاصها تبدل. حشومة نوجدو المستقبل بحال احمد لحليمي ديال التخطيط ولا عبد اللطيف لجواهري ديال بنك المغرب. اواه واحد عاقل على التقويم الهيكلي فبداية الثمانينات يوجد مونديال 2030. ولا فيصل لعرايشي المدير العام للشركة الوطنية للاذاعة والتلفزيون. حشومة. سالى وقتهم. خاص جيل جديد.

لبلاد غادية تولي ورش. بلا اطر قافزة بزاف صعيب نربجوه