گود سبور//

مازال هشام ايت منة رئيس الوداد الرياضي والمكتب المديري ديالو، كايحاولو يربحو الوقت ويتهربو من الإعلان بشكل واضح على رحيلهم وتقديم الاستقالة فالبلاصة كيفما طالبوهم بها الوداديين جمهور ومنخرطين، وناضو دابا علنو على فتح باب الانخراط.

ايت منة والمكتب ديالو كايزيدو يتحداو الوداديين اللي كايطالبو برحيلهم، وخرجو قبل لحظات من ظهر اليوم الثلاثاء، وعلنو على فتح باب الانخراط برسم الموسم الرياضي 2026-2027، وذلك لمدة شهر واحد، إلى غاية 5 يونيو 2026.

هذه الخطوة من هشام ايت منة والمكتب ديالو، كاتبين انهم باغيين يربحو الوقت وانهم ما عينيهمش يمشيو دابا، والدليل انهم علنو على انهم غادي يقدمو استقالتهم حتى للجمع العام اللي ما علنوش على الموعد ديالو، فالوقت اللي منخرطين النادي مشاو للقضاء وطالبو بفحص مالية النادي فالمرحلة التسييرية ديالهم اللي دوزو فيها عامين.