گود سبور//

قرر هشام آيت منة رئيس الوداد الرياضي، يتحدى جماهير الفريق الأحمر ومنخرطين النادي، وباغي يبقى فالرئاسة واخا كلشي الوداديين طالبوه بالاستقالة والرحيل، بعدما دخل الفرقة فالحيط، وآخرها الخسارة مع يعقوب المنصور البارح الاربعاء فستاد دونور فكازا فالبطولة، وراه شبعو فيه سبان ومعيار لدرجة أن الفيادرا ديالو هما اللي هربوه من المنصة، وسلت من الملعب فطوموبيل اخرى، وخلى طوموبيلتو فالباركينگ ديال الملعب، خوفا من غضب الجماهير.

وكشفت مصادر مطلعة أن هشام ايت منة داير محاولة جديدة باش يبقى فرئاسة الوداد الرياضي، وباغي يغمق على الجمهور تاني بتغيير المدرب، وناوي يگلس مع الفرنسي باتريس كارتيرون ويتافق معه على الفراق، هاذ الشي باش يكالمي الجمهور ويلصق الفشل ديالو فالمدرب اللي ما قدرش يحقق حتى شي رباح مع الوداد بعدما لعب 5 الماتشات.

نفس المصادر، كشفت أيضا أن هشام ايت منة والمكتب ديالو حلو قنوات التواصل مع محيط المدرب التونسي نصر الدين نابي اللي فايت درب فريق الجيش الملكي وكان مستواه مزيان معهم، وأنهم باغيين يشوفو معه يجي يشد الوداد خلال المرحلة المقبلة.

ووضحت المصادر، أن هشام ايت منة ممكن يلجأ حتى لولاد الوداد، ويقدر يشوف مع حمودة بنشريفة باش يدرب الفرقة فالمرحلة المقبلة.