گود سبور//

فالوقت اللي هشام ايت منة رئيس الوداد الرياضي خاصو يهضر مع النجم الاول د الفريق المفشش حكيم زياش، باش يديها فالكورة ويبعد شويا من مواقع التواصل الاجتماعي وصداعها، ناض بغا يحگر غير على الگول مهدي بنعبيد.

حكيم زياش اللي من نهار جا للوداد الرياضي مازال ما عطى داكشي اللي كايتسناو منو الوداديين للفريق، والمستوى ديالو بين التذبذب والإصابات، غارق فالنشاط فمواقع التواصل الاجتماعي حتى ولى عاطيها للمعاطية مع هذاك بن غفير ديال اسرائيل، واش دابا هاد حبة المشماش جابوه الوداد باش يلعب الكورة ويهز الالقاب ويفرح الجمهور ولا يتعطى ويتناگر فالبوسطات ديال انستغرام؟

هشام ايت منة طبعا ما يقدرش يهضر مع حكيم زياش، حيث السيد نجم والكراكطير ديالو صعيب، وإلى هضر معه وقاله ديها شويا فالتداريب ديالك وحاول ترجع دغيا من الاصابة وركز معنا فالكورة اللي هي خدمتك علاش جايبينك حنا أصلا، راه يقدر يدور فيه شي دورة خايبة وهذا الشي إلى ما نوضهاش معاه وهز صاكو زاد بحالو، وطبعا ايت منة ما يقدرش يدير هاكا وما عندوش أصلا الشخصية ديال رئيس الوداد باش يدخل لاعب سوق كورتور ويخليه يركز فخدمتو.

ايوا ايت منة حادگ غير يحگر على اللعابا ديال البطولة كيفما كان كايدير فشباب المحمدية والأمثلة تماك راه كثيرة من عبد اللطيف العراقي اللي كان خدام فرقتو الشباب وعطاها دمو قبل ما يلقى راسو خارج بيبانها حيث ما حناش الراس لايت منة، حتى ليوسف المطيع ومحمد المورابط، وشحال من لعاب فالمحمدية كان ضحية ديال تسيير ايت منة تما، وهاد المرة بان له فالوداد غير مهدي بنعبيد يخرج يتخبى به من غضب الجمهور بعدما وصل الحمرا بالتسيير ديالو الكارثي للهاوية، وبغا يقدم الگول الودادي كبش فداء ويمسح فيه الأخطاء ديالو كرئيس، ولكن بنعبيد كان قوي عليه وخرج وفضحو قدام الوداديين ببيان واضح وضوح الشمس فنهار جميل، والجمهور حتى هو عاق بايت منة باغي يقني للگول وقالو له الرئيس الحقيقي كايحمي اللاعبين ماشي كايدير الفتنة باش يهرب من المسؤولية ويتخبى ورا اللعابا، وراه تقرير الوينرز كان واضح وقاصح.