كود سبور//

ما لقاوش الوداد الرياضي شي حل باش يكونفوكيو امين بنهاشم اللي كلفوه بتدريب الفريق حتى نهاية الموسم، من غير انهم يقيدوه عند العصبة الوطني لكرة القدم الاحترافية كمساعد مدرب، حيث الفريق مازال متعاقد مع الجنوب افريقي رولاني موكوينا.

وباش يكون حاضر امين بنهاشم فالطاقم التقني د الوداد الرياضي فماتش الكلاسيكو ضد الجيش الملكي غدا السبت برسم الدورة 28 من البطولة فستاد دونور، اضطرّ الوداد برئاسة هشام ايت لفسخ عقد مساعد المدرب رولاني موكوينا الان فريس، وسجلو فبلاصتو امين بنهاشم عند العصبة الوطني لكرة القدم الاحترافية.

هذا الشي اللي كايدير فيها هشام ايت منا فالوداد، كايبين انه غادي بعشوائية فتسيير النادي وما باغيش يصحح الوضع، حيث دابا راه تدخلو فالاختصاصات ديال المدرب موكوينا اللي واخد من عندو عطلة وخلي المساعد ديالو، وناض ايت منا فسخ العقد مع هذا المساعد، والمدرب الجنوب إفريقي مازال ما تفارق مع الفريق الأحمر، وهذا الشي غايخلي الموقف ديالو موكوينا قوي إلى كان شي نزاع قدام الهيئات المختصة، حيث النادي جرا على مساعد موكوينا اللي معين من طرف الأخير، مع العلم ان موكوينا خاصو ياخد مليار إلى بغاو الوداد يفكو معه الجرة.