الرئيسية > كود سبور > اوناحي لـ”كود”: واخا كنت موعت بهاداك الحماس فالتيران راه كان في نبقى نجري حتى للغد وما ناوينش نبقاو فالربع فينا الجوع وباغيين نمشيو بعيد
07/12/2022 16:30 كود سبور

اوناحي لـ”كود”: واخا كنت موعت بهاداك الحماس فالتيران راه كان في نبقى نجري حتى للغد وما ناوينش نبقاو فالربع فينا الجوع وباغيين نمشيو بعيد

اوناحي لـ”كود”: واخا كنت موعت بهاداك الحماس فالتيران راه كان في نبقى نجري حتى للغد وما ناوينش نبقاو فالربع فينا الجوع وباغيين نمشيو بعيد

الدوحة كود ////

فحوار دارتو “كود” مع احد نجوم ماتش البارح ضد الصبليون عز الدين اوناجي٬ هدر على كيفاش كيعيش هاد اللحظة للي ما عمر الكورة المغربية وصلاتها. اوناحي قال فحوار بعد الماتش ف”ميكس زون” وكان رد علي اسئلة “كود” ومن بعد غادي يرد على اسئلة صحافيين مغاربة واجانب. “كود” كتنشر غير اجوبتو علي الاسئلة اللي سولاتو.

“كود”: ما عمر الكورة المغربية وصلات لهاد المستوى فتاريخها. باش كتحس فهاد اللحظة؟
اوناحي: واعيين باللي دخلنا للتاريخ. واعيين باللي ما عمر شي جيل سبقنا وصل لهاد المستوى فالكورة. يوصل لربع نهاية كأس العالم. تعرف باش كتكون فرحان وكتفرح الشعب معاك راه احساس واعر يستحيل تصورو. ما غادينش بقاو هنا. مازال فينا الجوع باش نزيدو للقدام.

“كود”: واش واعيين كلعابة لهاد المستوى فالكورة اللي وصلتو ليه؟
اوناحي: كاين وعي منا لهاد الشي كولو. تعرف راه عندنا لعابة عندهم موهبة كبيرة. راه نقدرو نمشيو بعد بزاف فهاد الكومبيتيسيون. اليوما غاديين نفرحو مع عائلاتنا. نفرحو بيناتنا =التسجيل كان البارح بعد الماتش= واليوما اي الاربعاء 7 دجنبر= غاديين نبداو نوجدو لماتش الربع.

“كود”: لوبجيكتيف رأس العالم؟
اوناحي: حنا تابعين الكوتش وليد. كنجيريو ماتش بعد ماتش. ما كنفكروش فشي ماتش وحنا مازال ما دزناش هاد المرحلة. دابا ليسبان زدناها. نوجدو الماتش الجاي وما عرفناش معاش غاديين نطيحو. =وقت التسجيل كان ماتش البرتغال وسويسرا يالله كيتلعب.
ما كانش عارف باللي غاديين نلعبو مع البرتغال فالربع=. غاديين نوجدو الماتش الجاي. ايلى ربحنا الربع غاديين نفكرو فالنصف. وحنا غاديين. طموحنا كبير ولكن كل مرحلة واستعدادها.

“كود”: هاداك الجهد اللي لعبتي بيه وهاديك الطاقة لكبيرة اللي درتيها فهاد الماتش مع الصبليون منين جبتيها؟
اوناحي: بصراحة ما حسيتش براسي درت شي ماتش جهد كبير وطاقة اكبر. لمغاربة وعائلاتنا كتفرجو فينا. راه تحفيز وكلشي كيكون ساهل ديرو. تصور مع الطاقة اللي كانت فالتيران كنت حاس براسي نبقى نجري مع الصبليون حتى لغدا.

كود”: كنتي موعت مع ذلك فهاد الماتش؟
اوناجي: كنت موعت فلاشوڤي ديالي فماتش كندا. ما كنتش متأكد نلعب فماتش الصبليون. كنشكر الطاقم الطبي اللي دار خدمة كبيرة. كانو كيديرو معايا العلاج حتى 5 المرات فالنهار باش نكون جاهز اليوم. بقيت كنبريباري ونوجد باش نلعب. ليگامو تمس شوية مع الشوڤي منفوخة ومع ذلك قدرت ندخل للماتش.

“كود”: دابا كتحسب براسك بعد هاد الماتش التاريخي اللي درتي باللي صحتك مزيان؟
اوناحي: اللا حاس براسي بيخير دابا.

موضوعات أخرى

29/01/2023 00:00

ماتت وما تسوق ليها حد.. بوليس بريطانيا لقا هيكل عظمي ديال امرا كانت مريضة وبعيدة على عائلتها

28/01/2023 22:00

الأهلي المصري وصل للمغرب باش يلعب الموندياليتو.. واللعابا فرحانين حيث المغاربة كبرو بهم فالاستقبال – تصاور

28/01/2023 21:30

“كود” جابت حقيقة وفاة جوج طالبات فوجدة: ماشي طالبات ووحدة مازال فغيبوبة والثانية كتهضر وفحالة صحية عادية

28/01/2023 21:00

“كود” جابت حقائق خطيرة على هرب اللاعب الجزائري بن العمري والمخابرات الجزائرية وراء رحيلو من المغرب