كود هناء ابو علي ////

البارح 11 يونيو 2025 فالعشية بمدينة الخيل بالمدينة الخضرا ببوسكورة فكازا دارت “دوزيم” عرض اولي فعمل قدماتو فموقعها الرسمي باللي “فيلم وثائقي رائع يجمع بين جمال الفروسية وأواصر الأخوة بين الأمم” واسمو “”المغرب، مملكة الفرسان”.

هاد لعجب غادي يدوز ف”قصص انسانية” اللي كيتحكم فيها الرجل القوي فالقناة اللي ولى غير كيخربق واسمو رضى بنجلون، نهار الاحد 15 يونيو 2025 مع العشرة دالليل.

“دوزيم” قالت باللي هاد “الفيلم الوثائقي” واخا هو ماشي بصاح، “ياخذكم “إلى كواليس حدث استثنائي ميز اختتام العام الثقافي قطر-المغرب 2024. يعود هذا الوثائقي إلى العرض المذهل لـفن ” التبوريدة” الذي أقيم في مركز الفروسية المرموق الشقب في الدوحة، بحضور صاحبة السمو الملكي الأميرة للا حسناء وسعادة الشيخة سارة بنت حمد آل ثاني”.

كيهدر على الفيلم الترويجي لدولة قطر كثر من بلادنا، على 50 فارس كيمثلو عدد من السربات فالمغرب فالدوحة فاختتام “سنة المغرب فقطر”.

هادا اولا ماشي فيلم وثائقي بل هو بحال دوك الاعمال التلفزيونية اللي كيديرهم “ام 6” الفرنسية كل احد. نفس الاسلوب. خدمة تعطات لجوج فرنساويين. ما كيفهمو والو فالتبوريدة لا فثقافة لبلاد. المارشي خداتو “سيگما” اللي خاص كل ادارة مغربية كدافع على تمغرابيت تقاطعها. شركة انتاج كتخدم لفرانسيس تمشي تبيع انتاجها للفرانسيس. المغرب ف2025 عندو كفاءات كبيرة فالاخراج فالتصوير. باراكا من عقدة الاجنبي الفرنسي.

هاد الاختيار خلى هاد “الكوموند” اللي سميتو “المغرب مملكة الفرسان” يكون بلا روح. مصور مزيان وصافي. لكن هدوك لفرنساويين ما قدروش يتوشيو عمق هاد التراث المتغلل فكل مغربي.

الغريب فهاد لعجب للي بالنسبة لي ماشي فيلم وثائقي، هو التسويق لدولة صغيرة ما عندها قيمة بحال قطر بحال شي دولة قوية. عمل على التبوريدة كيف كيوضح عنوانو ولكن بقى يمجد فدولة الشيخة موزة. كيعطي الانطباع للمشاهد باللي قيمة التبوريدة جاية من تنظيم حفل فقطر. اش هاد الانبطاح والاهانة للمغرب.

تصور دخلو الغاز والجزيرة و”الشقب” ديال الخيل ولبراهش ديال قطر ولبنات ديالو وفلتو يركزو على التبوريدة. على قصص ماليها. على لحرايفة اللي كيساهمو فيها من صحاب السرج واللباس والمكحلة….. دازو على هاد الشي مرور الكرام. حتى الموسيقى اللي ختاروها هادوك لفرانسيس كانت فاشلة. ما عارفينش ما داروش ابحاث باش يعرفو باللي هاد التراث عندو موسيقى مرتابطة بيه.

فهاد التكرفيص على تراث مغربي ساهمات الشركة الملكية لتشجيع الفرس ومديرها اللي طول بزاف عمر الصقلي. جا الوقت يمشي فحالو ومعاه هادوك اللي مدورهم عليه. تصورو غباء هاد الصقلي، دوزو ليه تصريح فهاد العجب المسمى “وثائقي” قال فيه “واخا كنعرفو التبوريدة غاديين نكتاشفو شي حاجة”. اي ايلى داز فقطر غاديين نكتاشفو شي حاجة جديدة. اللي تفرج ما غادي يكتاشف والو. الانبهار بهاد التراث المغربي كيكون باش كيكون تنظيمو فبلادنا ماشي باش يمشي يصبغ شي نظام بحال قطر.

ايلى “دوزيم” مخلصة مزيان فهاد الشي، مزيان ولكن ايلى ما مخلصة والو راه غير دعاية فابور للنظام القطري.

المغرب ما محتاجش لا لقطر لا لغيرها باش يفتاخر بالتبوريدة. “دوزيم” وبالاخص بنجلون رضى كيهين المغرب بهاد التخربيق. ظاهره وثائقي واخا هو دعاية فابور لدولة عدد سكانها هو عدد سكان الحي المحمدي فكازا