كود سبور//

خرج انور الغازي الهولندي من اصل مغربي، اللي كان فضل المنتخب الهولندي على المنتخب المغربي، وهذا الشي ملي كان فالطوب ديالو، قبل ما يتنادم معه الحال ملي شاف تألق المغرب بالوصول لدومي فينال مونديال 2022، ورجع كايحوم بمحيط المنتخب المغربي وكايروج باللي باغي يبدل الجنسية الرياضية ديالو باش يلعب مع المغرب، ساعة كان مات له الحوت، (خرج) كايقول بلي المغاربة ما كانش عليهم يمشيو المساطر القانونية باش ياخدو كاس افريقيا 2025، اللي داوه السنغال فخرق سافر لقانون الكورة بعد انسحابهم فالفينال.

وخرج انور الغازي اللي كايلعب دابا مع السيلية القطري، وقال فتصريح له: “يمكن كون كنت فبلاصتهو ويسمحو ليا خوتي المغاربة، ما كانت غادي نطالب باللقب بعد خسارة النهائي خصوصا بعد تسليم الكاس للسنغاليين، انا كنت غادي نخلي الكاس للسنغاليين ووغادي نرجع نحاول من بعد عامين، يقدو ياخد المغرب الكاس وبالفعل راه خداه ولكن ما غاديش نكون فرحان”.

هاد انور الغازي اللي كايقول هاد الهضرة وان المغرب كان خاصو يسمح فحقو، هو براسو مشى للمحكمة ديال الشغال فألمانيا دعى الفريق ديالو السابق ماينز الألماني حيث فسخو معه العقد من جانب واحد، حيث كان كايخرج يكتب شي ميساجات داعمين لفلسطين وضد اسرائيل، وملي تفارقو معه مشى كايجري دار محامي فمحكمة الشغل وفألمانيا وربحهم وخرجو له تعويضات على العقد اللي فسخوه معه، والسؤال هنا علاش هاد انور غازي ما سمحش فحق وباغي المغرب يسمح فحقو؟ واش هذا هبال ولا غيرة من اللاعبين المغاربة ولا شنو؟