كود كازا//

علمت “كود” من مصدر مطلع، أن أمين التهراوي، وزير الصحة والحماية الاجتماعية، كيعيش في “عزلة” إدارية، في سابقة من نوعها داخل الوزارة.

وحسب مصادر “كود” فالوزير التهراوي، مبغاش يدخل فحرب “الإعفاءات” بحكم أولا أنه ماشي ولد “الضومين” ديال الصحة، وثانيا خصو وقت باش يدير منهجيتو فالعمل داخل الوزارة.

مصادر “كود” أكدت بلي تأخر إخراج النظام الجديد للوزارة، دفع بعدد من المدراء والمسؤولين المنتمين لنقابات عتيدة وقوية، يشكلو تحالف ضد الوزير وفريقه.

باستثناء الكاتب العام للوزارة، اللي هو بروفايل “ثقيل” على مستوى الإدارة ومعندوش شبكة قوية ديال العلاقات وسط الوزارة، فإن الوزير الجديد كيعيش في جزيرة معزولة.

مصادر “كود” قالت بلي التهراوي باغي يقاد الوزارة ويصفيها خصوصا من طرف لوبي الشركات، عن طريق مسطرة توحيد الصفقات وفرض شروط صارمة لضبط هاد المارشيات، ولكن في نفس الوقت “معندوش فريق قوي”.

ووصفت بعض المصادر ما يحدث داخل الوزارة بـ”الانقلاب” على الوزير الجديد، لكن في الوقت التهراوي ماشي “ساهل” وماشي “ظريف” قدام أي خروقات أو اختلالات، وبلي النظام الجديد للوزارة غايكون بداية تصفية القطاع وتغييرات غاتشمل جميع المديريات بما يتناسب مع الاختصاصات الجديدة للوزارة في سياق تنزيل المجموعات الصحية الترابية والوكالات المرتبطة بالقطاع.