هشام أعناجي ــ كود الرباط //
خبير مالي وضح لـ”كَود” داكشي لي مبغاش وزير الاقتصاد والمالية يوضح لنواب الأمة فالبرلمان فاش كيتم التصويت على قانون المالية لسنة 2021، مكانش صريح معهم بخصوص القرض لي خدا المغرب فالسوق الدولية بقيمة 3 مليار دولار.
الخبير قال لـ”كود” :”هادشي مكانش مطروح نهائية فمشروع ميزانية 2021 ولا فالميزانية المعدلة ديال 2020″، مضيفا :”هاد القرض كيتجاوز ثلاث أضعاف القيمة لي تلعن عليها ولي هي مليار دولار”.
وأفاد الخبير المالي لـ”كود” بلي هاد الكريدي الجديد كيعني أن عجز الميزانية غايتزاد، وبالتالي توقعات قانون مالية 2021 غير سليمة وغير واقعية، مضيفا :”غايتزاد هاد العجز أي غادي يولي كثر من 10 في المائة”.
واستغرب الخبير نفسه لـ”كود” :”كيفاش القرض تخدا فنفس الساعة فاش كيتصوت على قانون المالية أي مع الرابعة من مساء يوم الإثنين”.
ويعد هاد القرض أكبر عملية لطرح السندات في تاريخ المغرب، حيث ماعمرو فات 2 مليار دولار فالعام. وهاد القرض ماشي مقحم وماشي مبرمج فالميزانية.
وحسب ذات المصدر فإن “العملية مكانش فيها الوضوح”، بل أكثر من ذلك حتى الفاعلين في السوق الدولية تفاجئو بهاد القرض.
وأكد ذات الخبير بأن المغرب حاليا عندو وضع مريح من العملة الصعبة مع انخفاض الواردات ويغطي مخزون العملة الصعبة حاليا 7 اشهر من الحاجيات.
واش القرض مخصص لعملية التلقيح أو للوضع الجديد في الكركرات؟.. مزال معرفناش الجواب.
طبعا مور هاد الخبار كولشي ضرب الطم. البرلمانيين مداروش الدور الرقابي على الحكومة فهاد الخصوص. وفق مصدر “كود”. لكن “شي وحدين حادكين فتهراس المقاولات الوطنية بالبوز السياسي”.
