كود – وكالات//

فـصباح اليوم الأحد 7 ديسمبر 2025، تعرّضات بنين لمحاولة انقلاب عسكري، بعدما خرجات واحد المجموعة صغيرة ديال العسكر فالتلفزيون الرسمي وعلنات إقالة الرئيس باتريس تالون والسيطرة على الحكم. هاد الظهور المفاجئ خلق روينة وسط المواطنين، قبل ما الحكومة تدخل وتوضح الصورة.

وزير الداخلية الحسن سيدو خرج ببلاغ رسمي، وقال فيه باللي “مجموعة متمردة من الجنود حاولات تزعزع استقرار البلاد، ولكن القوات المسلحة بقات مخلصة للقسم ديالها وقدرات تسيطر على الوضع بسرعة”. الوزير طمّن السكان وطلب منهم يرجعو لحياتهم الطبيعية بلا خوف.

وفي نفس السياق، وزير الخارجية أوشلجون أجادي باكاري صرّح لوكالة رويترز باللي “الوضع تحت السيطرة، والمجموعة لي دارت هاد المحاولة صغيرة وماعندهاش دعم من أغلب الجيش”، وأكد أن القوات الموالية للدولة رجعات الانضباط للمؤسسات.

من جهة أخرى، المجموعة الاقتصادية لدول غرب إفريقيا “إيكواس” ندّدات بهاد المحاولة الانقلابية وعبّرات على مساندتها للحكومة فمساعيها لاسترجاع الأمن والنظام.