كود سبور//

ما بقاوش الرجاء الرياضي غايسنيو مع الألماني راموفيتش باش يدرب الفريق فبلاصة المواطن ديالو جوزيف زينباور اللي قرر يمشي بحالو، وقررت ادارة النادي التفاوض مع مدرب آخر بإقتراح من عضو مستقبل من المكتب المديري واللي قريب يسنيو معه ويقدموه اليوم الخميس.

وحسب مصادر مطلعة، فالرجاء الرياضي فطريقهم للتعاقد مع المدرب البوسني روسمير سفيكو، وهذا الشي بإقتراح من العضو السابق للمكتب المديري عادل باقيلي، اللي كان قدم الاستقالة من المنصب ديالو فسبتمبر 2023 بعد 3 اشهر من التسيير مع محمد بودريقة حيث ما كانوش متاففين بزاف ديال الامور التسييرية.

واستغربت نفس المصادر من هاد الخطوة خصوصا وان عادل باقيلي ما بقى عندو حتى شي دور فالمكتب المديري للرجاء الرياضي، وعبرت على تخوفها من أن هذا الشي يقدر يخلق مشاكل داخلية فالمكتب المديري وبين الاعضاء ديالو ووسط المنخرطين والرجا في غنا عن المشاكل وخصوصا فهاد الوقت اللي كايعيشو النادي.

وتسألت نفس المصادر، على شنو علاقت باقيلي المستقيل من المكتب المديري بعملية تعيين المدرب الجديد، مع العلم انه من المنتظر تكون انتخابات فالرجاء بعد أسابيع لانتخاب مكتب مديري جديد يقدر هذا المدرب ما يكونش داخل فالمشروع ديالو، وفحالة ما كان شي اخفاق مع هذا المدرب فالرئيس المؤقت عادل هالا هو اللي غايتحمل المسؤولية.

ووضحت ذات المصادر ان المدرب البوسني روسمير سفيكو غايقدموه اليوم الخميس وغدا غايمشي لتونس باش يبدا الخدمة ديالو، وسط شكوك فالقدرة ديالو على قيادة الخضرا خصوصا انه ما عارفش الفريق ولم يشرف على الانتدابات الجديدة، واذا فشل غاتكون هادي هي السبا اللي غايلصقو فيه الفشل ديالو.

وبالإضافة إلى هذا الشي فالمسير السابق، مقتارح حتى عبر الكريم الجيناني باش يكون هو المساعد للمدرب الجديد، وهذا الشي، فالوقت اللي تسألت نفس المصادر على مصير هشام ابو شروان اللي ضحى مع الفريق ومازال ما توصل بمستحقات اكتر من 7 أشهر، وراه كاين دابا مع الفريق فالمعسكر بتونس للإشراف على التدريب ديالو حيث ما كاينش مدرب.