وكالات//

علنات السلطات فولاية كاليفورنيا الأمريكية، نهار الأربعاء، أن 7 ديال الناس مازال ما تعرف فين كاينين، من بعد نهار واحد على الانفجار اللي وقع فمخزن ديال الشهب الاصطناعية، واللي خلّى جوج ديال الناس يتصابو، وزاد شعل العافية فالمنطقة القروية اللي حداه.

الانفجار وقع عشية الثلاثاء، من بعدما شعلات العافية فداك المخزن اللي كاين فبلدة إسبارتو، فشمال الولاية.

هاد الانفجار جا أيام قليلة قبل العروض التقليدية ديال الشهب الاصطناعية اللي كيديروها فمختلف مدن ومناطق أمريكا، باش يحتافلو بعيد الاستقلال، اللي هاد العام غادي يوافق نهار الجمعة 4 يوليوز.

وقالت مديرية الوقاية المدنية (الإطفاء) فكاليفورنيا فبلاغ: “مازال 7 ديال الأشخاص مفقودين، والمسعفين والمحققين خدامين بلا توقف مع مول الأرض باش يعرفو فين مشاو”.

وزادو وقالو إن “هاد النوع من الحوادث نادر بزاف، حيث خاص المنشآت بحال هادي تحترم قوانين صارمة ديال ولاية كاليفورنيا، وزيد عليها القوانين الفيدرالية اللي كتنظم تخزين المتفجرات”.