ݣود ـ بني ملال//

لبارح الخميس مع ديك جوج والربع ديال نهار سمعات ساكنة قصبة تادلة ومعاها القصيبة، زاوية الشيخ وأبي الجعد، اغرم العلام تانوغة، تلݣلفت والمناطق المجاورة واحد الصوت مجهد بحال الانفجار فالسما، خلّى الناس يحسو بالخوف والرعدة، حتى البيبان والشراجم تحركو من بلايصهم.

الانفجار دار البلبلة وسط ساكنة المنطقة على محور 100 كيلومتر وبقاو  كيتساءلو شنو وقع بالضبط، خصوصاً فغياب أي بلاغ رسمي من السلطات ولا من المؤسسة العسكرية. ومني قوات الهضرة، بدات تروج بزاف ديال الفرضيات: كاين اللي قال باللي ممكن يكون الأمر مرتبط بمناورات عسكرية ولا تفجير ديال ذخيرة قديمة ولا حتى مرور طائرات حربية كتفوت سرعة الصوت، بما أن المنطقة قريبة من قاعدة عسكرية، وكاين اللي ربط الصوت بالأنشطة ديال معمل الإسمنت اللي كيعتمد على المتفجرات باش يهرس الجبال ويستخرج المواد، مصدر آخر قال الاستمطار الصناعي وكاين لي قال ربما صوت تفجيرات المركز الشريف الفوسفاط في احد الغابات المجاورة.. وسط هاد الغموض الساكنة باقي كتسنا التوضيح الرسمي اللي يشرح ليهم شنو هو هاد الانفجار اللي زعزع المنطقة وخلى كلشي خرج من دارو ومخلوع وخايف، خصوصا العيالات وولادهم صغار لي كيتمناو ميتعاودش هادشي.